Létt hefur verið lítillega á grímuskyldu á Sjúkrahúsinu á Akureyri. Nú eru þrettán sjúklingar inniliggjandi á sjúkrahúsinu með Covid-19
Samkvæmt Vikublaðinu eru 13 inniliggjandi á Sjúkrahúsinu á Akureyri með Covid-19 veiruna. Þar af eru átta á lyflæknigadeild, þrír á skurðlækningadeild og tveir á gjörgæsludeild en hvorugur þeirra er í öndunarvél. Þá er talsverður fjöldi starfsmanna fjarverandi með Covid-19 og því verður áfram takmarkanir á göngudeildaþjónustu og valaðgerðum. Hefur Vikublaðið þetta eftir tilkynningu á vef SAk en þar kemur fram að sjúkrahúsið sé enn á hættustigi.
Í tilkynningunni kemur einnig fram að lítillega hafi verið létt á grímuskyldu á sjúkrahúsinu.
„Að ígrunduðu máli er talið mögulegt að létta lítillega á grímuskyldu: Grímuskylda við móttöku og umönnun sjúklinga er áfram í gildi, burtséð frá fjarlægðamörkum. Taka má niður grímu þegar hægt er að viðhafa 2ja metra fjarlægð utan klínískrar starfsemi. Þetta tekur gildi frá og með deginum í dag. Heimsóknargestir og göngudeilda sjúklingar skulu áfram bera grímur við komu á sjúkrahúsið,“ segir í tilkynningunni.