Seint í fyrradag var Covid-19 smit staðfest hjá starfsmanni Umdæmissjúkrahúss Austurlands í Neskaupsstað. Í gær voru sjötíu sýni tekin í tengslum við þetta smit. Þá hafa heimsóknir á sjúkrahúsið verið takmarkaðar fram á þriðjudag.
Þetta kemur fram í tilkynningu frá aðgerðastjórn almannavarna á Austurlandi en Austurfrétt fjallaði um málið.
Segir í tilkynningunni að strax í gærmorgun hafi, í samvinnu við rakningateymi, verið ráðist í að kortleggja hverjir höfðu verið í samskiptum við starfsmanninn.
Svo að engin áhætta sé tekin voru allir þeir starfsmenn sem höfðu verið við vinnu á sjúkrahúsinu síðustu daga skimaðir í gær. Tekin voru alls um sjötíu sýni sem þarf svo að senda til Reykjavíkur til greiningar. Ættu því niðurstöður ekki að berast fyrr en seint í kvöld.
Ákveðið hefur verið, í samráði við sóttvarnateymi HSA að lámarka heimsóknir á sjúkrahúsið og hjúkrunarheimilið fram á þriðjudag, á meðan verið er að rannsaka mögulega útbreiðslu smits. Verða heimsóknir einungis leyfðar í sérstökum tilfellum.