Tveimur ferðamönnum var bjargað af Kötlujökli í gær. Annar þeirra hafði örmagnast.
Seinni partinn í gær, fimmtudag, barst beiðni frá tveimur ferðamönnum sem voru á ferð að eða frá íshelli í Kötlujökli, eftir aðstoð. Hafði annar þeirra örmagnast á göngunni. Feykir hefur eftir tilkynningu frá Landsbjörgu að fólkið hafi verið statt á Vatnsrásarhöfði, rétt norður af Remundargilshöfði en þar liggur þekkt gönguleið úr Þakgili að Kötlujökli.
Fram kemur í frétt Feykis að björgunarsveitir á svæðinu frá Vík og austur á Kirkjubæjarklaustur hafi verið boðaðar út og lögðu af stað til aðstoðar. Fólkið fannst á gönguleiðinni rétt um klukkan 18 og fékk það aðstoð niður að björgunarsveitarbíl.
Þeim var svo keyrt inn í Þakgil, þar sem þeir höfðu skilið bíl sinn eftir við upphaf gönguferðarinnar. Þurftu þeir ekki frekari aðstoð og lauk því starfi björgunarsveitanna.