Nýjasti gestur bræðranna Gunnars og Davíðs Wiium í hlaðvarpsþættinum Þvottahúsið er bloggarinn og Covid-19 samsærisdrottningin Inga Guðrún Halldórsdóttir. Athugið, þær kenningar og skoðanir sem kom fram í þessu viðtali endurspegla ekki skoðanir og afstöðu Mannlífs í málum sem snúa að Covid, bólusetningum og því um líkt.
Inga sem er einnig tækniteiknari og félagsliði hefur skrifað á annað hundrað bloggfærslur um covid19, bóluefnin og kenningar um alræðishyggju og „hina miklu endurræsingu.“
Að sögn ræddu bræðurnir Gunnar og Davíð við Ingu með opnu hjarta en gagnrýnum hug og þá sérstaklega Davíð sem átti afar erfitt með að draga ályktanir sem snúa að þeim samsæriskenningum sem Inga lagði fram í viðtalinu.
Ljósmynd: Aðsend
Hið Nýja upphaf
Inga, sem er kristin, segir að hennar hlutverk á þessari jörðu sé að þjónusta heildina og standa upp í Guðshugrekki og benda á samsærið, lygarnar og ranglætið. Minna má það nú varla vera.
Hvað varðar Covid-19 faraldurinn og bólusetningarnar, vill Inga meina að um sé að ræða mjög skipulagða aðgerð sem hefur með hagræðingu að gera og vissa hlýðnisherslu. Í því samhengi talar hún um Festa, miðstöð um samfélagsábyrgð og sjálfbærni. Festa eru einskonar samtök eða gæðastimpill sem stórfyrirtæki hafa aðild að, sem brúa bilið milli hins opinbera og einkarekinna stórfyrirtækja.
Þar eru haldnar ráðstefnur og fleira tengt umhverfismálum, endurskipulagning á fjármálakerfinu, eins og það er uppbyggt í dag, og endurskilgreining á því hvernig samfélag okkar er byggt upp.
Þar er líka mikið minnst á heimsmarkmið til árið 2030 sem kallast „The Great Reset.” eða „Nýtt upphaf.“
„Ég veit að það eru fullt af fyrirtækjum sem eru inn í þessu og þetta virðist vera gæðastimpill, þú sérð þetta heimsmarkmiðamerki, þú alla þessa ráðamenn hjá World Economy of Forum að þeir eru allir með þetta heimsmarkmiðabarmmerki, þetta tengist allt The Great Reset,“ sagði Inga og bætti við. „Agenda 2130 er áætlun sem er til í skýrslum sem var gerð af sameinuðu þjóðunum og þessi skýrsla er áætlun The New World Order í rauninni, total control yfir öllu,” sagði Inga á átti við skuggasamtök sem samsærisfólk trúir á og telur að stjórni heiminum á bakvið tjöldin.
Inga hélt áfrma að útskýra ástæðuna fyrir þessu öllu.
„Lúsifer kemur í ljósengillsmynd, hann kemur ekkert með horn og hala, hann nær þér ekkert þannig.”
„Ásetningurinn er að ná heimsbyggðinni undir vald lítillar stjórnar ríks fólks. Lúsifer kemur í ljósengillsmynd, hann kemur ekkert með horn og hala, hann nær þér ekkert þannig.” En inni í þessari ljósengilsmynd er hulin gildra. Gildran er að við förum undir þetta totalerian, efnahagskerfi þar sem til dæmis er kveikt og slökkt á kortinu þínu allt eftir því hvort þú hagir þér vel eða ekki.”
Aðildarríki Sameinuðu þjóðanna, þar á meðal Ísland, hafa skuldbundið sig til að vinna skipulega að innleiðingu markmiðanna. Heimsmarkmiðin eru samþætt og snúa að öllum þáttum sjálfbærrar þróunar, hinnar efnahagslegu, samfélagslegu og umhverfislegu. Þetta kemur allt fram á heimasíðu Festa á Íslandi
Inga vill meina að þetta sé allt skreytt með pallíettum og kósýlegheitum en sé í raun bara úlfur í sauðagæru. Að um valdagræðgi örfárra einstaklinga búi þarna að baki og það standi til að afmá alla mannúð, andlegheit, sjálfstæða, skapandi hugsun úr manninum og í raun framkalla heim sem Guðrún Bergmann kom einnig inn á í viðtali í Þvottahúsinu, hið foreldralausa samfélag.
Valdbeitingin, sem hún vill meina að sé iðkuð kerfisbundið, er að hennar mati allt hluti af áætlun á sálfræðilegu plani og hafi með blindna hlýðni að gera. Hvernig stjórnvöld herða skrúfuna og losa svo smá áður en hert er aftur. Smátt og smátt eru valdhafar búnir að búa til ákveðið trúarkerfi í sameiginlegri vitund mannsins sem hefur með hlýðni og einangrun að gera, allt keyrt af ótta við einhvern sameiginlegan óvin, óvin sem getur verið veirusýking eða eins og hún Inga nefnir hlýnun jarðar, sem hún vill meina að sé ekki af mannavöldum.
Ljósmynd: Aðsend
Valinn maður í hverri stöðu
„Þetta endar alltaf á einstaklingnum, þú ferð í Costco og það er allt í einhverju plasti, ég meina af hverju færð þú ekki bara hveitið í einhverjum sekkjum eins og í gamla daga? Það er alltaf verið að láta einstaklinginn taka allt á sig og nú á einstaklingurinn að taka það á sig út af því að ríkistjórnin hefur ekki staðið sig í rekstri spítalana.”
Þá talaði hún einnig um út, frá einum bloggpistli sínum, að það sé valinn maður í hverri stöðu í þessu samsæri. Nefnir í því samhengi foreldra Kára Stefánssonar og Ölmu Möller. Hún vill meina að ættartengsl margra lykilmanna í stjórnmálum, innan heilbrigðiskerfis sem og í einkarekstri og eignarhaldi stórfyrirtækja séu augljós og þar af leiðandi hagsmunir einstakra fjölskyldna eða hópa leiðandi afl í þessari endurræsingu. „Þetta er galið ef að þú veist það að hann er að vinna fyrir erlendan lyfjarisa sem er í bóluefnaframleiðslu, risinn er Amgen sem er í samstarfsverkefni við bæði Active og Microsoft við framleiðslu á bóluefnum,“ segir Inga og er að tala um Kára Stefánsson.
PCR prófanir á kóki og apríkósu
„Sjáum ásetninginn í stríði, þá eru menn bara að ná sér í landsvæði, sumir vilja bara plánetur
Gunnar og Davíð veltu upp þeim möguleika að ásetningurinn með þessari endurræsingu sem greinilega er í kortunum, samkvæmt heimasíðu Festa, sé af hreinum hug og að forsendur hennar sé að göfga og skilvirkja uppbyggingu samfélags manna á þessari jörð.
„Sjáum ásetninginn í stríði, þá eru menn bara að ná sér í landsvæði, sumir vilja bara plánetur. Svo var þessi austurríski alþingismaður sem gerði próf á kóki og fékk jákvæða niðurstöðu og síðan var það forseti afríkuríkisins Tansaníu sem gerði próf á apríkósu og fékk jákvæða niðurstöðu,” segir Inga um áræðanleika PCR prófana og vill meina að þau próf séu notuð í áróðurskyni.
Inga er orðin þreytt
Gunnar sem kannski er ekki jafn mikill efahyggjumaður og bróðir sinn Davíð, spurði Ingu í viðtalinu hvort þessi þróun væri ekki bara eðlileg og það sem þorri fólksins vill. Nefndi í því samhengi það tímabil sem Trump gegndi hlutverki forseta Bandaríkjanna. Það puðruðust allir yfir honum eins og enginn væri morgundagurinn en á sama tíma var hann sá sem var kosinn til að gegna þessu hlutverki. Samfélagsuppbyggingin, vildi Gunnar meina, er alltaf í samræmi við megin þorra fólksins og því sé lítið annað að gera en bara halla sér aftur og fylgjast með. Sagði hann ennfremur að 90% þeirra sem myndu horfa eða hlusta á þetta viðtal muni halda því fram að Inga væri klikkuð.
Inga svaraði því til að hún segist vera orðin þreytt, hún er eins og komið hefur fram, búin að skrifa blogg sín á annað ár og hefur það tekið mikla orku frá henni. Hún segist vera komin á stað þar sem hún þurfi mögulega að draga sig í skel hvað þessi mál varðar enda að eigin sögn búin að gera nóg til að vekja fólk til vitundar um spillingu og stórsamsæri hinnar fámennu elítu.
Viðtalið má hlusta á í heild sinni á öllum helstu streymisveitum sem og að horfa á það í mynd Hér fyrir neðan