Halldór Nellett hefur gengið í gegnum ýmislegt í störfum sínum á sjónum en í nýjasta þætti Sjóarans segir Halldór frá því þegar hann starfaði á varðskipinu Ægi og var ræstur út vegna eldgossins í Vestmannaeyjum árið 1973.
„Ég er nýkominn á dekk, viðvaningur eins og það var kallað. Það var svona stökk milli messagutta og háseta, þannig að ég var þar á milli. Það var hringt um miðja nótt, ég vaknaði ekki við símann sjálfur. Móðir mín vaknaði. Varðmaður niður á Ingólfsgarði þar sem skipið lá sagði að Halldór ætti að koma strax um borð. Mamma sagði „Heyrðu, hann á ekki vakt núna“.“
Svaraði þá varðmaðurinn að hann ætti samt að koma strax um borð
„Það var ekkert verið að segja hvað var í gangi. Það var bara hringt á leigubíl og farið niður eftir og þá komst maður að því hvað var í gangi. Við vorum komnir úr löngum túr, komum í land daginn áður og eins og sjómenn gera, menn náttúrulega sletta úr klaufunum og fara í land. Það gekk illa að ná í mannskap og mig minnir að lögregla hafi verið send upp í Þórskaffi. Það var bara náð í liðið og farið með þá um borð.“
Sjáðu viðtalið í heild sinni hér.