Hin bráðfyndna og skemmtilega Júlíana Sara Gunnarsdóttir er undir Stækkunargleri Mannlífs þessa vikuna.
Júlíana birtist fyrst á skjáum landsmanna í þáttunum Þær Tvær, árið 2014, sem hún skrifaði ásamt vinkonu sinni Völu Kristínu.
Nú leikur Júlíana í hinni geysivinsælu gamanþáttaröð Venjulegt fólk, þar sem hún fer með eitt af aðalhlutverkunum, ásamt því að vera einn af handritshöfundum þáttanna.
Mannlíf komst að því að Júlíana getur verið snögg upp, en lætur það fylgja að hún sé fljót að róa sig aftur, henni leiðist að heyra vekjaraklukkuna hringja á morgnana og fallegasti staðurinn sem hún hefur farið á er Cassis í Frakklandi.
Fjölskylduhagir? Kærasta Andra og móðir Gunnars Loga og Þórdísar Láru. Er líka svo heppin að hann á tvö börn, þau Viktor Leví og Thelmu Hrönn.
Menntun/Atvinna? Leikkona að mennt en vinn við það að vera allskonar, eins og börnin mín segja. En fyrir áhugasama að þá vinn ég við það í dag að vera leikkona, handritshöfundur og leikstjóri.
Uppáhalds sjónvarpsefni? Ég fer alltaf í kleinu þegar ég er spurð að svona spurningum því ég verð alveg blankó. Ætli ég verði ekki að henda gríni hérna inn, eins og The Office og Modern Family. Svo verð ég nú líka að segja Homeland þó það sé nú alls ekki grín.
Leikari? Nú fór ég aftur í kleinu en ég get þó sagt Julia Roberts. Hún varð uppáhalds leikkonan mín eftir Notting Hill, enda hef ég séð þá mynd oftar en ég get talið. Jake Gyllenhaal er þó leikari sem mig dreymir um að leika á móti.
Rithöfundur? Nú kemst upp um mig en ég les allt of lítið, eiginlega ekki neitt nema handrit.
Bók eða bíó? Getið eflaust giskað á það eftir síðasta svar. Bíó.
Kók eða pepsi? Collab.
Fallegasti staðurinn? Cassis í Suður Frakklandi en það spilar mikið inn í að finnast hann rómó, enda farið tvisvar á hann með Andra mínum.
Hvað er skemmtilegast? Mér finnst sem betur fer margt mjög skemmtilegt en þá aðallega samverustundir með fjölskyldunni og þá er ég líka svo heppin að vinna við áhugamálið mitt.
Hvað er leiðinlegt? Nú ætla ég að leyfa mér að svara eins og unglingur en það er að heyra vekjaraklukkuna hringja á morgnana.
Hvaða flokkur? Ég er meira til hægri.
Hvaða skemmtistaður? Ég hefði getað svarað þessu fyrir nokkrum árum en nú hef ég ekki hugmynd um það þar sem ég er ekki mikið að stunda skemmtistaðina í dag.
Kostir? Duglegur doer.
Lestir? Óþolinmóð og stundum er ég frekar fljót upp þó það verði nú að fylgja sögunni að ég fer nú fljótt niður aftur.
Hver er fyndinn? Börnin mín.
Leiðinlegur? Ætli það séu ekki bara þeir sem eru fljótir að dæma annað fólk og gleyma að líta í sinn eigin barm.
Stærsta augnablikið? 07.08.15 og 17.03.17.. fæðingardagar barnanna minna að sjálfsögðu.
Mestu vonbrigðin? Ég ætla að gefa ykkur leiðinlegt svar en það er ekkert hægt að segja annað en covid.
Hver er draumurinn? Góð heilsa og hamingja alla tíð.
Mesta afrek sem þú hefur unnið á þessu ári? Ætli það sé ekki eitthvað af því sem ég hef gert í vinnunni á þessu ári en eitt af því er, þegar við gerðum fjórðu seríu af Venjulegu Fólki. Því til gamans má geta að þá hafa aldrei verið gerðar eins margar seríur af framhaldsleiknu efni á Íslandi.
Ertu búin að ná öllum þínum markmiðum? Ný markmið koma með hverju markmiði sem maður nær svo já og nei.
Manstu eftir einhverjum brandara? Ég var að klára brandarastund með krökkunum svo já það eru nokkrir sem þau sögðu mjög ferskir í minni en held ég sleppi því að segja þá hér.. Enda prumpu-og kúkabrandarar í fyrirrúmi.
Vandræðalegasta augnablikið? Allt of mörg. Ég man þó vel eftir einu síðan í fyrravetur en þá var ég að opna bílinn minn í rennihálku beint fyrir utan verslun þar sem það voru líklegast svona fimmtíu manns í röð. Ég rann undir bílinn og langaði að þykjast vera dáin svo ég þyrfti ekki að skríða undan honum og face–a þetta móment.
Mesta gleðin? Að ná markmiðum sínum og að eignast þessar gleðisprengjur sem ég á. Ég er búin að tala mikið um börnin mín en þegar ég hugsa um gleði og þakklæti þá hugsa ég að sjálfsögðu fyrst til þeirra.
Mikilvægast í lífinu? Að vera góð manneskja og lifa lífinu lifandi.