Bjartmar Þórðarsson, leikstjóri, leikari, handritshöfundur og tónlistarmaður, gleymir seint jólunum þegar merkingar á pökkum skoluðust til.
„Einu sinni skolaðist eitthvað til með merkingar á gjöfum hjá stórfjölskyldunni – þannig að ég fékk gjöf sem var augljóslega ekki ætluð mér (mjög ellilífeyrisþegalega bók) – og mun eldri ættingi fékk í staðinn gjöf sem var klárlega ætluð mér,“ rifjar hann upp.
„Í kjölfarið varð andrúmsloftið þrungið meðvirkni þar sem allir voru að vonast til að einhver annar myndi koma orði að þessu. Það þorði enginn að taka af skarið, hvað þá ég. Það vill enginn segja: „Þú hefur nú eitthvað verið að ruglast,“ ef það er svo ekki tilfellið.
Þetta var á endanum þagað út af borðinu. Mjög vandræðalegt og frekar fyndið. Gefandinn hefur eflaust lært sína lexíu af þessu, þ.e. varðandi merkingu pakka.“