Boðskapur múmínálfanna | Mannlíf

Vikan

Boðskapur múmínálfanna

Eitthvert múmínæði hefur gripið heimsbyggðina. Múmínbollar, -skálar, -diskar og -hnífapör eru eftirsóttir safngripir, á Facebook taka menn próf til að athuga hvaða persónu úr bókunum þeir líkjast mest og sögur Tove Janson eru endurútgefnar víða, meðal annars á Íslandi.

Lesa má um múmínálfana í kökublaði Vikunnar.

Á síðasta ári var sett upp sýning á málverkum Tove í Dulwich Gallery í London. Á sama tíma mátti sjá á veggjum South Bank Centre nokkrar af frummyndunum sem hún teiknaði og málaði fyrir bækurnar og í Kew Gardens var lögð múmínslóð börnum og foreldrum þeirra til skemmtunar. Ótalmargir lögðu leið sína þangað og fetuðu sig frá Múmínsnáðanum til Snúðs og þaðan til Múmínpabba og -mömmu. Japanir bættu um betur og settu upp Múmíngarð enda kallast einfaldleiki og fagurfræði múmínálfanna á við margt í menningu þeirra í austri.

Án efa hefur snjöll markaðssetning Arabia-postulínsfyrirtækisins eitthvað með þetta að gera. Vandað postulín með ámáluðum þessum áleitnu og heillandi ævintýramyndum er einfaldega ómótstæðilegt. En fleira kemur til, boðskapur bókarinnar er jöfnuður og virðing veranna hver fyrir annarri og allra fyrir náttúrunni. Einmitt það sem er flestum nútímamönnum ansi hugleikið um þessar mundir.

Eitthvert múmínæði hefur gripið heimsbyggðina.

Hingað til hafa hönnuðir Arabia einbeitt sér að fyrstu bókunum, endurgert Litlu álfana og stóra flóðið, Halastjörnuna, Vetrarundur í Múmíndal, Pípuhatt galdramannsins, Minningar Múmínpabba og Örlaganóttina. Í fyrra kom hins vegar á markað lína sem kallast á við síðustu bókina, Seint í nóvember. Það er níunda og síðasta bókin um múmínálfana en Tove skrifaði hana skömmu eftir að hún missti móður sína. Sagan ber þess vitni en þar er tekist á við erfiðar tilfinningar, missi, sorg og söknuð.

Tove var lærður myndlistarmaður. Foreldrar hennar voru bæði málarar og hún ólst upp í við sköpun og úrvinnslu hugmynda. Hún var aðeins fjórtán ára þegar fyrst var haldin sýning á verkum hennar. Margir hafa orðið til þess að benda á hve ótrúlega næmlega henni tókst að draga upp tilfinningar og andrúmsloft í gegnum einfaldar myndskreytingar múmínálfabókanna. Nú er komið í verslanir nýtt múmínálfaleirtau með jólalegu þema og hjá Máli og menningu ný safnbók um þessar indælu verur . Þeir sem ekki þekkja álfana fá hér tækifæri til að kynnast þeim og hinir til að endurnýja kynnin.

Fleira má lesa um múmínálfana í kökublaði Vikunnar.

 

 

Ertu með frétt?
Hefur þú skemmtilegt efni til að koma á framfæri?

Sjá einnig

Kaupa áskrift
Kaupa áskrift

Vinsæl íslensk og vegleg tímarit

Ef þú vilt tryggja þér glæsileg og vegleg tímarit, komdu í áskrift!

Kaupa áskrift

Lesa Mannlíf á netinu