Fyrsta stiklan úr nýju Batman-myndinni sem Matt Reeves leikstýrir hefur litið dagsins ljós og aðdáendur Batmans eiga ekki orð yfir þá umbreytingu sem írski leikarinn Colin Farrell hefur orðið fyrir í hlutverki Mörgæsarinnar og margir Twitter-notendur segjast hafa átt í erfiðleikum með að þekkja hann í gervinu, að því er fram kemur í samantekt The Independent.
Það er Robert Pattinson sem leikur Batman í myndinni sem er nokkurs konar forsaga og sýnir hina frægu karaktera á yngri árum. Aðrir leikarar sem við sögu koma eru meðal annars Zoe Kravtiz, Paul Dano, John Turturro, Peter Sarsgaard og Andy Serkis.
Vegna kórónaveirufaraldursins hafa tökur legið niðri í nokkra mánuði en áætlað er að þær hefjist aftur í byrjun september og að myndin verði frumsýnd í október 2021.