Erlu Hlynsdóttur fréttastjóra DV og samstarfsfólki hennar var gert að fara í sóttkví þegar COVID-19 smit kom upp á ritstjórninni á dögunum. Erla er nú laus úr sóttkví og segist frelsinu fegin, enda hafi tekið á að þurfa að búa við miklar hömlur á flestum sviðum í tæpar tvær vikur. Einhvern veginn hafi henni þó tekist að halda þetta út án þess að missa vitið og þar hafi nokkur einföld ráð komið að góðum notum.
1. Klæða sig á hverjum degi. „Þetta kann að virðast sjálfsagt en ekki þegar þú ert ekkert endilega að fara út. Það hjálpar líka að greiða hárið og jafnvel setja á sig maskara. Við höfum okkur jú til fyrir okkur sjálf en ekki aðra.“
2. Fara í göngutúr – líka þegar það er rigning. „Í sóttkví má fara í göngutúr en mikilvægt að vera ekki á fjölförnum stöðum og passa upp á tveggja metra regluna. Dagsbirtan og súrefnið eru nauðsynleg til að lifa þetta af andlega.“
3. Hlaupa undan þeim sem virða ekki tveggja metra regluna. „Strax á leiðinni heim úr vinnunni, þar sem mér og vinnufélögunum hafði verið tilkynnt um að við yrðum að fara í sóttkví, þurfti ég markvisst að forða mér undan ókunnugu fólki sem næstum labbaði á mig. Reynum öll að vera með í þessu og virða tveggja metra regluna.“
4. Rútína. „Eins leiðinlegt og það hljómar þá skiptir máli að halda í rútínuna sína, vakna á ákveðnum tíma alla morgna, fara í sturtu, borða hádegismat í hádeginu og svo framvegis.“
5. Leyfa sér smá. „Þegar manni eru settar hömlur á flestum sviðum er þó alltaf hægt að fá sér góðan mat. Fjöldi þeirra veitingastaða sem senda heim hefur snaraukist á tímum COVID og eru allir með sóttvarnir og snertilausa afgreiðslu á hreinu. Starfsfólkið skilur matinn bara eftir fyrir utan hjá þér, hringir bjöllunni og bíður síðan minnst tvo metra í burtu þar til þú sækir matinn þinn. Það er fínt að panta frá Domino´s en líka leyfa sér fínni og dýrari mat. Fólk í sóttkví á það skilið.“
6. Nýta heimsendingar – ekki bara á mat. „Flestir tengja heimsendingar við mat en það er hægt að fá svo margt fleira heimsent, til dæmis senda sjálfum sér blómvönd til að hressa upp á heimilið.“
7. Góðir vinir. „Það er sjaldan jafn gott að eiga góða vini og þegar maður er í sóttkví. Sérstaklega ef vinirnir eru svo yndislegir að koma með nammi og ís.“
8. Netflix. „Í sóttkví er algjörlega nauðsynlegt að hafa aðgang að óendanlega miklu sjónvarpsefni. Ég mæli sérstaklega með Ozark, Good Girls og Brooklyn Nine Nine.“