Föstudagur 29. mars, 2024
-4.2 C
Reykjavik

Farðaði Katy Perry og kastaði vatnsblöðru í Cate Blanchett

VefTv

- Auglýsing -

Hlaðvörp

- Auglýsing -

Ísak Freyr Helgason förðunarfræðingur hefur á undanförnum árum ferðast heimshorna á milli til að farða margar fegurstu konur heims. Hann er nýkominn frá Frakklandi þar sem hann farðaði Katy Perry og kastaði (óvart) vatnsblöðru í augað á Cate Blanchett.

Ísak var sautján ára gamall þegar hann ákvað að verða förðunarfræðingur. „Ég var algjör gelgja á myndlistarbraut í Fjölbrautaskólanum í Breiðholti og mér fannst svo ómerkilegt að teikna myndir af eplum og könnum og læra að skyggja kassa. Ég hætti þess vegna og fór beint á þriggja mánaða námskeið í förðunarskóla sem hét EMM School of Make Up. Eftir það var ekki aftur snúið.“

Hann segir sína helstu áskorun hingað til hafa verið að halda geði á tímum þegar dagskráin er þétt. Ísak er vanur að fljúga út um víða veröld til þess að farða margar fegurstu konur heims. Frægar leikkonur, söngkonur og fyrirsætur. Hann hefur verið á mjög miklu flakki upp á síðkastið. „Ég flaug nýlega á ponsulitla eyju við Palermo á Ítalíu sem heitir Panarea en þar lenti ég í einu mesta ævintýri sem ég hef á ævi minni upplifað. Ég fékk að kynnast hlutum þar sem ég vissi ekki að væru til og henti óvart vatnsblöðru í augað á Cate Blanchett! Þaðan fór ég til L.A í viku til að farða fyrir herferð og eftir það strax til Frakklands til að farða Katy Perry. Þetta hefur verið heilmikið stuð,“ viðurkennir Ísak.

Ég fékk að kynnast hlutum þar sem ég vissi ekki að væru til og henti óvart vatnsblöðru í augað á Cate Blanchett!

Nýlega lenti hann í ógöngum þegar hann var í tökum í skógi rétt fyrir utan Los Angeles. Þar var allt morandi í höggormum og stór skilti út um allt til þess að vara fólk við þeim. „Ég heyrði í alvörunni í höggormunum þarna allt í kring en þurfti að standa kyrr með förðunarburstana og reyna mitt besta að pissa ekki í mig úr hræðslu,“ segir Ísak og skellir upp úr.

Ég heyrði í alvörunni í höggormunum þarna allt í kring en þurfti að standa kyrr með förðunarburstana og reyna mitt besta að pissa ekki í mig úr hræðslu.

Ísak býr í London með kærastanum sínum en er með annan fótinn hér heima á Íslandi. Hann segist reglulega koma til landsins til að kúpla sig út og slappa af. „Það skiptir mig svo miklu máli að finna innri ró og slappa af í íslenskri náttúru.“

Það er margt spennandi fram undan hjá Ísaki en hann hlakkar mest til að fara til Oman í byrjun nýja ársins.

Aðspurður hvaða stjörnu honum hafi þótt skemmtilegast að farða segir hann: „Mér fannst ótrúlega skemmtilegt að mála Katy Perry. Hún er algert gull og sjúklega fyndin en á sama tíma með svakalega góða orku í kringum sig.“

Mér fannst ótrúlega skemmtilegt að mála Katy Perry. Hún er algert gull og sjúklega fyndin en á sama tíma með svakalega góða orku í kringum sig.

- Auglýsing -

Óskalistinn

Hvaða föt og fylgihlutir eru á óskalista hjá þér?

Mig langar í geggjaða, prjónaða lopapeysu. Flottan klút eftir Hildi Yeoman, Balenciaga-stígvél, næs kasmírpeysu og par af trylltum Tom Ford-gleraugum.

Hver er þín helsta tískufyrirmynd?

- Auglýsing -

Í rauninni hef ég enga tískufyrirmynd. Ég var alltaf rosalega mikið fyrir Grace Jones þegar ég var yngri en það hefur breyst. Ég hef alltaf verið frekar mikill hippi í mér og vil helst hafa allt þremur númerum of stórt. Ég elska hreyfingar í efnum og skrítin mynstur. Elsku Jame, kærasti minn, er alltaf svo hissa á því sem ég kaupi en segir alltaf að ég líti vel út, elsku kallinn. Ef eitthvað er að angra mig þá klæði ég mig í svart og mikið dökkt. Þá verð ég pínulítið eins og skríðandi skjaldbaka.

Ef eitthvað er að angra mig þá klæði ég mig í svart og mikið dökkt. Þá verð ég pínulítið eins og skríðandi skjaldbaka.

Hvað er möst að eiga fyrir veturinn?

Góða úlpu. Ég elska Drangajökul-úlpuna mína frá 66°Norður. Hún heldur á mér hita allan veturinn og er einstaklega góð í útitökum. Hún er tveimur númerum of stór svo það komast fleiri en ég fyrir í henni.

Hvaða nude-varalitur er bestur?

Sá sem ég nota mest núna er pottþétt liturinn Spanish Pink frá Tom Ford.

TOPP 5 hjá Ísaki

Ísak segir topplistann sífellt breytast hjá sér, enda fær hann mikið af snyrtivörum sendar til sín. Hér er það sem er í uppáhaldi hjá honum í augnablikinu.

Sensai Bronzing Gel frá Kanebo er í uppáhaldi.

1. Eitt af því sem er ómissandi og hefur verið í fyrsta sæti hjá mér í mörg ár er Sensai Bronzing Gel frá Kanebo. Kremið er með geláferð sem gefur húðinni fallegan ljóma í stað þess að þekja. Algjört töfraefni. Ég, mamma, amma, systir mömmu og allt heila ættartréð notar þetta.

2. Just Skin, litaða rakakremið frá Chaintecaille, er eina rakakremið með þekju í sem bræðir sig inn í húðina og þó að þú færir yfir andlitið með stækkunargleri myndirðu ekki taka eftir því að manneskjan væri með eitthvað á húðinni.

3. Syncro Skin Lasting Liquid Foundation frá Shiseido er farði sem ég lifi fyrir. Hann rennur yfir húðina eins og silki, þekur miðlungs og gefur ótrúlega fallega áferð. Það er ótrúlega auðvelt að vinna með hann og allir sem kynnast honum falla fyrir honum. Ég notaði alltaf Luminous Silk-farðann frá Armani en Shiseido hefur hressilega tekið fram úr.

4. Skin Food frá Weleda er þykkt rakakrem sem er í rauninni fyrir þurra bletti en ég elska að nota það yfir allt andlitið áður en ég ber farða á. Mér finnst húðin fá svo ótrúlega fallegan ljóma en þá púðra ég rétt yfir þá staði sem ég vil hafa matta ef mér finnst húðin of glansandi.

5. Eye defining liner frá Tom Ford er fljótandi eyeliner sem er með ofurmjóum oddi framan á og þess vegan er hægt að gera mjög fína línu. Ég elska líka hvað hann er extra svartur.

Mynd / Saga Sigurðardóttir

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 

Lestu meira

- Auglýsing -

Veistu meira um málið?

Deila

Nýtt í dag

Mest lesið í vikunni

Raddir

Í fréttum er þetta helst...

- Auglýsing -