Framleiðandi stakk upp á tannviðgerðum

Leikkonan Kirsten Dunst segir einn framleiðanda Spider-Man hafa reynt að sannfæra hana um að láta laga á sér tennurnar fyrir tökur myndarinnar. Dunst neitaði og segir það aldrei hafa komið til greina að láta breyta tönnum sínum.

Dunst sagði frá þessu í viðtali við ástralska miðilinn News. Hún segir viðkomandi hafa reynt á lúmskan hátt að fá hana til að fá sér „fullkomnar Barbie-tennur“ eins og hún orðar það. Hún nafngreindi þó ekki aðilann sem stakk upp á tannviðgerðum við hana.