Ég er frekar nægjusöm og hef kinnroðalaust sætt mig við eina fullnægingu þegar ég stunda kynlíf með öðrum því ein er jú betri en engin og allt það. Undur og stórmerki gerðust hins vegar um daginn þegar þær urðu fleiri en ein. Enginn annar en ég hafði náð að veita mér fullnægingu oftar en einu sinni í röð svo þú getur rétt ímyndað þér hamingju mína þegar toppnum var náð í fyrsta skipti, annað skipti og það þriðja!
Þegar ég ræddi þetta við vinkonur mínar á kokteilakvöldi sem við héldum nýlega, hver fyrir framan sinn tölvuskjá, (ekki annað í boði á þessum tíma heimsfaraldurs), varð ég ekkert hissa þegar þær sögðust aldrei hafa fengið fleiri en eina fullnægingu í kynlífi með mönnunum sínum. Ef þær voru yfir höfuð svo heppnar að ná einni. Karlar hafa þann eiginleika fram yfir okkur að eiga frekar auðvelt með að fá það í kynmökum og jafnvel án lítillar fyrirhafnar. Við þurfum margar, kannski flestar, að hafa aðeins meira fyrir því en þeir en svo leggja sumar konur ekkert upp úr því að fá fullnægingu í kynmökum og finnst nándin ein og sér nóg. „Ég hef ekki alltaf náð að fá fullnægingu en samt verið fullnægð,“ sagði til dæmis ein vinkona mín á kokteilakvöldinu áðurnefnda.
Í bókinni The Multi-Orgasmic Woman segir höfundurinn og læknirinn Rachel Carlton Abrams að meðalkona geti fengið það mörgum sinnum. Konur þurfi ekki hvíldartíma á milli fullnæginga eins og karlar, svo þær geti haldið kynferðislegri örvun lengur og náð fullnægingu aftur án lítillar fyrirhafnar.
Dr. Jessica O’Reilly segir í bók sinni The New Sex Bible að þótt hægt sé að ná fleiri en einni fullnægingu í einni atrennu sé það ekkert endilega betra en að ná einni. Hún segir að þótt rannsóknir hafi sýnt að um 43% kvenna hafi upplifað raðfullnægingar sé hlutfall þeirra kvenna sem geti fengið þær hærra, þær vilji það bara ekkert endilega. Þannig að engin kona þarf að örvænta þótt hún hafi ekki náð fleiri en einni fullnægingu í röð. Hins vegar er ýmislegt hægt að gera til að auka líkurnar á því, langi mann (eða í þessu tilfelli konu) að láta á það reyna.
Gott er að byrja ein með sjálfri þér.
Galdurinn er að hætta ekki heldur halda örvuninni gangandi. Ef þú finnur að svæðið er orðið viðkvæmt fyrir snertingu skaltu bíða í u.þ.b. 10 sekúndur og byrja svo aftur.
Vertu opin fyrir því sem er í gangi.
Tengdu saman huga og líkama. Ef þú hefur litlar væntingar um að fá fullnægingu þá getur það haft áhrif á það hvernig líkaminn svarar nautninni. Í stuttu máli sagt: Ef þú gerir ekki ráð fyrir því að fá fleiri en eina fullnægingu í kynmökunum … þá verður ein allt og sumt.
Styrktu grindarbotninn.
Rannsóknir hafa sýnt að vel þjálfaðir grindarbotnsvöðvar auka á unað í kynlífi. Með því að spenna og styrkja vöðvana eykst blóðflæði á svæðinu en gott blóðflæði er einn grunnþáttur kynlífsnautnar og fullnægingarstjórn.Tilfinningin við að gera grindarbotnsæfingar er eins og að hætta að pissa í miðjum klíðum, spenna og sleppa.
Ekki vanmeta forleikinn.
Munnmök eru málið að því er dr. Rachel Carlton Abrams segir í bók sinni The Multi-Orgasmic Woman. Hún segir að fyrir flestar konur sé auðveldast að fá fullnægingu þegar snípurinn sé örvaður með munnmökum og það að fá fullnægingu fyrir samfarir auðveldi þeim að fá aðra fullnægingu í samförunum því líkaminn svari þá betur örvuninni í leggöngunum.
Ekki stoppa.
Mundu að lykillinn að því að fá fleiri fullnægingar en eina í einu er að stoppa ekki.
Fullnæging skv. Íslensku alfræðiorðabókinni:
„Hámark kynmaka eða sjálfsfróunar; einkennist af sterkri vellíðunarkennd og auknum blóðþrýstingi og hjartslætti; skapast hjá karlmanni einkum við örvun getnaðarlims og leiðir oftast til sáðláts, og hjá konum einkum við örvun sníps. Hjá báðum kynjum fylgir slökun.“