Heiða Björg Hilmisdóttir hefur gegnt embætti varaformanns Samfylkingar síðustu ár og verið viðloðandi flokkinn um árabil. Það kom því mörgum á óvart að þingmaðurinn Helga Vala Helgadóttir skyldi skora Heiðu á hólm með því að bjóða sig fram til embættisins – ekki síst Heiðu sjálfri, sem telur sig einfaldlega vera betri kost í embættið. En hvaða kosti telur Heiða sig hafa fram yfir Helgu Völu?
„Mér finnst ég hafa marga kosti sem hafa nýst í þessu starfi, þótt aðrir hafi örugglega sína kosti líka,“ svarar Heiða, eins og sannur pólitíkus. „Ég tel til dæmis skipta máli að forysta Samfylkingarinnar hafi breidd sem endurspeglist meðal annars í því að formaður og varaformaður starfi ekki á sama vettvangi, þinginu. Stjórnmálaflokkum hættir nefnilega til að vera mjög uppteknir af störfum þingsins og það vill gleymast að einn þriðji af hinu opinbera fer fram á sveitastjórnarstiginu. Þaðan kem ég. Ég gegni hlutverki varaformanns Sambands íslenskra sveitarfélaga og ég tel það mikilvægt á meðan formaðurinn er á þingi.“
Heiða kveðst lítt gefin fyrir að hreykja sér en segir þó liggja í augum uppi að mikil uppbygging hafi átt sér stað innan flokksins síðustu ár. „Við Logi [Einarsson] tókum auðvitað við Samfylkingunni á skrítnum tíma. Flokkurinn hafði nánast þurrkast út af þingi og við unnum dag og nótt við að byggja hann upp ásamt breiðum hópi af góðu fólki. Núna ríkir samstaða innan flokksins og gleði. Fólk er sammála um að stefnan, jafnaðarmannastefnan skipti máli, ekki hvaða fólk gegni hvaða stöðum. Mér finnst áríðandi þegar svona mikilvæg ár eru fram undan, þar sem kosið verið í alþingiskosningum og borgarstjórnarkosningum, að við höldum í þennan samstöðuanda og þennan baráttuanda fyrir jafnaðarmannastefnunni.“
Hún tekur fram að samstarfið við Loga sé gott. Þau séu samstiga og skipti með sér verkum. „Formaðurinn er auðvitað talsmaður okkar á meðan varaformaðurinn hefur mikilvægu hlutverki að gegna, sérstaklega innan flokksins. Ég tel að það væri óheppilegt að vera varaformaður sem er alltaf að krefjast þess að fá athygli þegar það er í raun formaðurinn sem á að vera andlit flokksins og tala út á við.“
Lestu viðtalið við Heiðu í heild sinni.