Tónlistarmógúllinn Simon Cowell mun ekki snúa aftur í dómnefnd hinna geysivinsælu þátta Britain’s Got Talent vegna meiðsla sem hann hlaut í reiðhjólaslysi fyrir skömmu. Í hans stað kemur Ashley Banjo og verður sá í dómnefndinni ásamt Alesha Dixon, Amanda Holden, og David Walliams í undanúrslitaþættinum sem fram fer í næstu viku.
Simon Cowell hefur verið í dómnefnd þáttanna síðan þeir hófu göngu sína árið 2007 en vefsíðan Metro hefur eftir honum að læknar hafi bannað honum að vinna á meðan hann jafnar sig eftir reiðhjólaslysið. Hann segir Ashley Banjo munu verða góða viðbót við dómnefndina því hann þekki þáttinn. „Ég gæti ekki hugsað mér nokkurn betri til að sitja í sætinu mínu á meðan ég fylgi ráðleggingum læknanna,“ segir Simon og bætir við: „Ég hata þetta fjárans hjól!“
Simon hryggbrotnaði í slysinu en er á batavegi eftir aðgerð og sagður vera farinn að geta gengið aftur.