Ingibjörg Steinunn hjá Odda Prentmeti og Sigríður Dagný hjá Birtíngi sendu frá sér fréttatilkynningu um nýtt FKA-tímarit sem að þessu sinni kemur út í samstarfi FKA og Birtíngs.
Kæra félagskona!
Við hefjum sumarlesturinn með fróðlegum viðtölum og hressandi umfjöllun í glæsilegu tímariti sem verður sent rafrænt á félagskonur á miðvikudaginn.
Það eru hæfileikakonur hvert sem litið er hjá FKA og einmitt tvær sem standa í stafni er kemur að þessu glæsilega tímariti.
Við vörpum ljósi á fjölbreytni sem er til staðar í atvinnulífinu og kynnum félagið okkar FKA um land allt og ársskýrslu Félags kvenna í atvinnulífinu með tímaritinu sem er gefið út af Birtíngi útgáfufélagi og prentað hjá Prentmeti Odda.
Ingibjörg Steinunn hjá Prentmeti Odda og Sigríður Dagný hjá Birtíngi eru báðar félagskonur og öflugar á sínu sviði og hafa frá forvitnilegum hlutum að segja sjálfar, líkt og aðrar konur í útgáfubransanum í FKA.
Aðeins efsti hlutinn af trénu eða 13% er nýttur í pappírsframleiðslu.
„Við erum í gríðarlega umhverfisvænum iðnaði þar sem flestar prentsmiðjur á landinu eru Svansvottaðar og knúnar af hreinni orku. Iðnaðurinn styður einnig við skógrækt. Vegna pappírsiðnaðarins þá stækka nytjaskógar í Evrópu á hverjum degi sem nemur 1.500 fótboltavöllum. Aðeins efsti hlutinn af trénu eða 13% er nýttur í pappírsframleiðslu. Annað er nýtt í húsagerð, húsbúnað og orkunotkun. Skógrækt er gríðarlega mikilvæg í umhverfis- og loftslagsmálum því að á hverju ári tekur eitt tré að jafnaði 22 kg af kolvíðoxíði og gefur frá sér súrefni. Nytjaskógar vaxa síðan mun hraðar en venjulegir skógar. Prentmet Oddi er einnig af stærstu samstarfsaðilum í Birkiverkefninu sem Landgræðslan og Skógrækt ríkisins stendur fyrir,“ segir Ingibjörg Steinunn.
„Tengsl eru tækifæri,“ segir Ingibjörg Steinunn og eru þær Sigríður Dagný báðar sammála um að efni sem fjallar um félagskonur sé ekkert annað en til fyrirmyndar – og samvinnan dásamleg og samstarfið við aðrar félagskonur frábært.
„Notkun á nýrri tækni við framleiðslu efnis, dreifingu og neyslu tímarita hefur orðið til þess að endurskoðun á sér stað alþjóðlega hvað varðar tímaritaútgáfu. Miklar tækniframfarir á sviði fjarskipta og miðlunar hefur orðið til þess að hindrunum hefur verið rutt úr vegi. Almenn hagsæld á Íslandi og aukinn frítími fólks samhliða mörgum samfélagslegum breytingum í atvinnulífinu hefur hvatt til breytinga á tímum heimsfaraldursins. Sökum fámennis á Íslandi hefur fjölmiðlamarkaðurinn hér á landi ákveðna sérstöðu eins og fjölbreytt efni og á það jafnt við um þá fjölmiðla sem stuðst hafa við hefðbundnar miðlunarleiðir eins og tímarit, útvarp, vefmiðla og sjónvarp. Útgáfa fyrir fyrirtæki og félagasamtök hefur aukist hjá Birtíngi með góðum árangri, en við sérhæfum okkur í efnisframleiðslu allt frá ljósmyndum yfir í textagerð auk þess sem við gefum út vinsælu tímaritin, Hús og híbýli, Gestgjafann og Vikuna,“ segir Sigríður Dagný hjá Birtíngi.
#hreyfiafl #fka #sýnileiki #tengslanet #Vikan #PrentmetOddi
@Ingibjörg Steinunn Ingjaldsdóttir
@Sigríður Dagný Sigurbjörnsdóttir
Hér að neðan má nálgast blaðið