Eignaðist þriðja barnið í nóvember.
Ása Elínardóttir fékk þrjár tilnefningar til Hlustendaverðlaunanna 2018, sem söngkona ársins, fyrir plötu ársins og lag ársins.
„Ég byrjaði að skrifa ljóð þegar ég var 12 ára og var mjög iðin við það. Ljóðin hjálpuðu mér að rýna í tilfinningar mínar og skilja mig betur. Mörg þeirra voru hádramatísk meðan önnur voru súrelísk og flippuð,“ segir Ása í viðtali í 8. tölublaði Vikunnar. „Ég átti þykka bók með ljóðum eftir mig sem fóru hægt og rólega að breytast í tónlist. Þetta var svo fallegur tími. Ég var hægt og rólega að átta mig á því hver ég var. Tónlistin var bjargvætturinn minn.“
Fyrsta lagið sem Ása gaf út var Paradise of Love í október 2016 og í fyrra gaf hún út þrjú lög sem fóru í spilun; Always, Crocodile Tears og Broken Wings. „Ég hef sent frá mér þrjú myndbönd sem eru á YouTube og í nóvember síðastliðnum kom fyrsta sólóplatan mín út. Ég hef því miður ekki haft mikinn tíma til að auglýsa hana þar sem ég eignaðist þriðja barnið mitt 10. nóvember,“ segir Ása.
Hægt er að hlusta á nýju plötuna hennar á Spotify og fylgjast með henni á Snaptchat undir notendanafninu asaelinar.
Texti / Ragnhildur Aðalsteinsdóttir
Mynd / Hákon Davíð Björnsson