Pörun víns og súkkulaðis er að verða algengari en áður.
Við höfum gjarnan mælt með því að sleppa vínberjunum á ostabakka og einnig að hafa konfektkassa vilji maður fara vel með vínið en pörun víns og súkkulaðis er að verða algengari en áður.
Þegar konfektkassinn er í „aukahlutverki“ skiptir kannski ekki öllu máli hvaða rauðvín verður fyrir valinu, bara að það sé tannín- og sýrulítið, mjúkt vín og vel þroskað – til dæmis Rioja-vín, Bordeaux-vín af góðum árgangi, Chile-vín eða Pinot Noir.
Sama gildir um dökkt súkkulaði, það getur verið yndislegt að enda máltíð með því að laumast í Omnom-súkkulaði (eða annað!) og vera með sams konar vín og lýst hér að undan við höndina.
Aftur á móti ef sæt súkkulaðikaka er í eftirrétt, verður að hugsa á öðrum nótum og velja sæt vín en þá er það virkilega til að magna upplifunina.
Við höfum gert margar tilraunir í Vínskólanum og óneitanlega eru nokkur vín betri en önnur: Rivesaltes Grenat hefur vinninginn, styrkt vín eins og Banyuls sem er líka ljómandi (enn betra ef smávegis kaffibragð bætist við). Sæt eðalfreyðivín eins og Moscato d‘Asti eða rósafreyðivín Malvasia frá Bava eru ómótstæðileg. Aftur á móti eru sæt vín eins og Tokay, Late Harvest eða Sauternes ekki á réttum stað hér.
Umsjón / Dominique Plédel Jónsson og Eymar Plédel Jónsson