Hver er tilgangurinn með að láta vín anda og hvernig er það gert? Ein leið til þess er að umhella víninu í karöflur.
Hvenær er virkilega þörf á að umhella víni?
Það er í fáum og vel afmörkuðum tilfellum:
1. Fyrir eldri vín, t.d. portvín, þar sem er botnfall í víninu sem er óaðlaðandi að fá í glasið. Í þessum tilfellum þarf að umhella varlega til að eyðileggja ekki vínið.
2. Fyrir ung vín sem eru vart tilbúin til drykkjar. Umhellingin mýkir vínið/tannínin, og gerir það aðgengilegra, vínið virkar 1 til 1 ½ ár eldra en það er, sérstaklega ef umhellt er aftur á flöskuna.
3. Ef ætlunin er að bera vínið fram á karöflu sem er fallegri en flaskan.
Kostir og gallar
Kostir: Til að losna við botnfall í glösin annars vegar og að gera ung vín tilbúnari til drykkjar. Vert er að geta þess að Reserva og Gran Reserva-vínin frá Spáni hafa þegar fengið þann þroska sem þarf og þurfa almennt ekki umhellingu.
Gallar: Hægt er að eyðileggja eldri vín með því að umhella óvarlega, sömuleiðis er hætta á að missa gæði úr víni sem er tilbúið til neyslu. Oft er nóg að leyfa víninu að anda svolítinn tíma í glasinu áður en þess er neytt.
Umsjón / Dominique Plédel Jónsson og Eymar Plédel Jónsson