Bjór er ekki bara góður kaldur í góðra vina hópi, heldur má líka brúka hann í bakstur og matargerð. Hér er skemmtileg uppskrift sem inniheldur bjór.
Kjúklingur og spergilkál í bjórsósu
fyrir 4
1 bakki kjúklingabringur, skornar í stóra bita
gróft sjávarsalt
nýmalaður svartur pipar
2-3 msk. olía
2 ½ dl bjór
2 tsk. dijon-sinnep
safi úr ½ sítrónu
1-2 msk. púðursykur
1 lítill spergilkálshaus, skorinn í litla bita
fersk steinselja (má sleppa)
Stráið ríkulega af salti og pipar á kjúklingabitana og hitið olíu á pönnu. Steikið kjúklinginn þar til hann hefur tekið fallegan lit.
Takið bitana af pönnunni og setjið til hliðar. Bætið bjór, sinnepi, sítrónusafa og púðursykri á pönnuna og skrapið vel af, þannig að allt samlagist. Bætið þá spergilkáli út í og látið sjóða í 5-10 mín. eftir því hversu vel soðið þið viljið hafa spergilkálið. Bragðbætið með salti og pipar og raðið kjúklingabitunum aftur ofan í sósuna.
Látið malla þar til kjúklingurinn er orðinn vel heitur í gegn. Berið gjarnan fram með pasta, til dæmis tagliatelli.
Umsjón / Kristín Dröfn Einarsdóttir
Myndir / Aldís Pálsdóttir
Stílisti / Ólöf Jakobína Ernudóttir