Klassískur eftirréttur sem er auðvelt að útbúa.
Brenndur rjómi, eða creme brulée, er mjög auðvelt að laga. Þessi vinsæli eftirréttur er gjarnan í boði á veitingahúsum og uppáhald margra.
Hægt er að bræða sykurinn á yfirborðinu undir grilli en einnig með gasbrennara ef þið eigið hann.
Gott er að nota aðeins litaðan sykur á yfirborðið, hann brennur betur en sá hvíti.
CREME BRULÉE
fyrir 6
5 dl rjómi eða matreiðslurjómi
1 vanillustöng
80 g sykur
6 eggjarauður
3 msk. hrásykur (t.d. demera-sykur)
Hér er það sem þarf í creme brulée.
1. Hitið ofninn í 140°C. Setjið rjóma í pott. Kljúfið vanillustöng eftir endilöngu og skafið kornin í pottinn, hitið rjómann með kornunum og vanillustönginni að suðu. Látið standa í 10-20 mín.
2. Þeytið eggjarauður og sykur létt saman.
3. Hellið rjómanum, gegnum sigti, út í eggjamassann og þeytið létt saman.
4. Setjið 6 form í ofnskúffu og skiptið blöndunni í þau (1 ½ dl form).
5. Sjóðið vatn í potti eða katli og hellið í skúffuna. Bakið þetta í 25 mín. og kælið síðan. Þetta má allt gera daginn áður og geyma í ísskáp en sykurbráðina er best að gera rétt áður en bera á réttinn fram.
6. Stráið hrásykri á yfirborðið á hverju formi og bræðið sykurinn með brennara eða undir heitu grilli.
Umsjón / Sigríður Björk Bragadóttir
Myndir / Rut Sigurðardóttir