Fátt er yndislegra en að vakna við dýrindis matarilm á morgnanna og enn betra er að fá matinn færðan í rúmið á fallegum bakka af sínum nánustu. Jólin og aðventan eru tíminn til að nostra við sína nánustu, leyfa þeim að sofa út á meðan sparilegur morgunmatur er útbúinn.
Hér eru nokkrar uppskriftir að einföldum og gómsætum morgunverðaréttum.
Ofnbökuð egg með parmesan
fyrir 1
Dásamlegur morgunverður með lítilli fyrirhöfn.
handfylli af spínati
½ lárpera
2 egg
1 msk. feta-ostur
salt
pipar
Hitið ofn í 180°C. Setjið spínat í botninn á litlu eldföstu móti, skerið lárperuna í þunnar sneiðar og leggið ofan á spínatið. Brjótið eggin ofan í mótið og sáldrið feta-osti yfir. Kryddið með salti og pipar eftir smekk. Bakið í 25-30 mín. Berið fram heitt.
Lítið þarf til að breyta til í þessum rétti, ólíkir ostar eða krydd geta gefið réttinum algjörlega nýtt bragð, um að gera að prófa sig áfram og aðlaga að sínum bragðlaukum%%
Appelsínu-aníshristingur
fyrir 1
safi úr einni appelsínu
börkur af ½ appelsínu
2 dl mangó, frosið
1 banani
¼ tsk. anís, mulinn
Setjið allt í blandara og maukið þar til allt er orðið vel samlagað.
Heslihnetuhafragrautur með sveskjum
70 g heslihnetur
30 g pekanhnetur
½ msk. kakó
100 g sveskjur
200 g tröllahafrar
1 tsk. vanillukorn
Ristið hneturnar á pönnu og færið yfir í matvinnsluvél. Maukið í 30 sek. og bætið við kakói, sveskjum, höfrum og vanillukornum. Maukið vel saman. Takið 60 g af hafrablöndunni og setjið í pott ásamt 1 dl af vatni og 1 dl af mjólk, sjóðið þar til blandan hefur þykknað. Berið fram heitt ásamt smávegis af mjólk, ávöxtum og sáldrið kakódufti yfir.
Umsjón / Guðrún Ýr Eðvaldsdóttir
Stílisti / Ólöf Jakobína Ernudóttir
Myndir / Hákon Davíð Björnsson