Þennan geggjaða rétt er gott að bera fram með fiski eða kjúklingi en hann getur auðveldlega staðið sem aðalréttur borinn fram með góðu brauði og salati.
Eggaldinbaka
1 klst. og 10 mín.
3 lítil eggaldin
2 msk. ólífuolía
1 tsk. salt
1 flaska maukaðir tómatar (tómatpassata)
3 msk. ferskt óreganó, saxað
4 msk. fersk basilíka, söxuð
1 tsk. svartur pipar
3 egg
400 g kotasæla
50 g + 2 msk. parmesan-ostur, rifinn
Hitið ofninn í 200°C. Skolið og skerið eggaldinin í frekar þunnar sneiðar eftir endilöngu. Raðið þeim á bökunarplötu með bökunarpappír, dreypið ólífuolíunni yfir og stráið salti ofan á. Bakið í 25 mín.
Setjið maukaða tómata í skál og blandið óreganó, basilíku og pipar saman við.
Takið fram aðra skál og blandið eggjum, kotasælu og 50 g af rifnum parmesan-osti saman.
Raðið einföldu lagi af eggaldinsneiðum í eldfast mót. Jafnið tómatblönduna ofan á og
dreifið kotasælublöndunni þar yfir. Raðið öðru lagi af eggaldinsneiðum ofan á, tómatblöndu og loks kotasælublöndu og endurtakið þar til eggaldinsneiðarnar eru uppurnar.
Endið á því að setja kotasælublöndu efst og dreifið 2 msk. af rifnum parmesan-osti ofan á áður en mótið er sett inn í ofn og rétturinn bakaður í um 30 mín. eða þar til osturinn byrjar að brúnast örlítið.
Umsjón / Sólveig Jónsdóttir
Stílisti / Hanna Ingibjörg Arnarsdóttir
Myndir / Aldís Pálsdóttir
Gestgjafinn er vandað fagtímarit um mat, vín og ferðalög. Allar uppskriftir í matarþáttum blaðsins eru þróaðar, eldaðar og prófaðar í tilraunaeldhúsi Gestgjafans. Blaðið fæst í öllum helstu matvöruverslunum og bókabúðum en einnig er hægt að gerast áskrifandi í vefverslun.