Í botninn á þessari dásamlegu ostaköku eru notaðar litlar amaretto-kökur sem gefa henni sparilegt marsipanbragð. Það er auðvitað hægt að nota annað kex, t.d. grahams-kex eða kanilkex en við mælum með að prófa Amarettini ef þið getið nálgast þær. Eins fæst frá sama framleiðanda litlar biscotti-kökur (Cantuccini) sem einnig ganga vel í botninn.
Ostakaka með vínberjum
12-14 sneiðar
botn:
200 g (1 pk.) Amarettini-kökur frá Piacelli
50 g heslihnetuflögur
100 g brætt smjör
örlítið salt
Setjið allt saman í matvinnsluvél og látið hana ganga í stuttum slögum þar til allt er vel samlagað. Smyrjið 22-24 cm smelluform með smjöri og setjið smjörpappír í botninn. Þrýtið blöndunni vel í botninn og upp með hliðunum. Setjið formið í kæli á meðan fyllingin er útbúin.
fylling:
350 g rjómaostur
250 g mascarpone-ostur
2 dl sykur
150 g 10% sýrður rjómi
2 tsk. vanilluduft
3 stór egg
1 dl hveiti
Hitið ofn í 140°C. Hrærið saman rjómost, mascarpone-ost og sykur, bætið sýrðum rjóma og vanilludufti saman við og hrærið þar til allt er vel samlagað.
Setjið egg út í eitt í einu og hrærið vel á milli. Setjið að lokum hveiti saman við og blandið vel. Hellið fyllingunni yfir botninn og bakið í 1 klst.
Slökkvið þá á ofninum og látið kökuna kólna alveg inni í honum áður en hún er sett í kæli, gjarnan yfir nótt.
ofan á:
400-500 g blá eða rauð steinlaus vínber, skorin í tvennt
safi úr 1 lítilli sítrónu
1 msk. hunang
2 dl rjómi, þeyttur
börkur af 1 límónu (má sleppa)
Blandið saman vínberjum, sítrónusafa og hunangi og látið liggja í a.m.k. 1 klst. Sigtið þá safann frá berjunum og setjið hann í lítinn pott. Sjóðið vökvann niður í síróp og blandið aftur saman við berin.
Setjið þeyttan rjóma ofan á kökuna og síðan vínberin yfir. Skreytið með límónuberki ef vill.
Umsjón / Kristín Dröfn Einarsdóttir
Myndir / Aldís Pálsdóttir
Stílisti / Ólöf Jakobína Ernudóttir