Ef þið þurfið að snara upp gómsætri köku og hafið bara hálftíma, þá er þetta kakan. Það besta við hana, fyrir utan hvað hún er einföld og góð, er að öllum líkar hún, bæði börnum og fullorðnum.
Bananarúlluterta
4 egg, stór
160 g sykur
65 g kartöflumjöl
2 tsk. lyftiduft
3 msk. kakó
2-3 tsk. olía til að pensla pappírinn með
Hitið ofninn í 240°C (220°C á blástur). Þeytið egg og sykur saman þar til blandan er létt og ljós, það tekur u.þ.b. 5-6 mín. Setjið þurrefnin í skál, sigtið þau út í og blandið varlega saman við með sleikju. Setjið bökunarpappírsörk í ofnskúffu, hún á að vera það stór að pappírinn nái upp með hliðunum. Penslið eða strjúkið með pappír olíu á bökunarpappírinn og klemmið hann saman í hornunum þannig að hann sé eins og skúffan. Hellið deiginu í ofnskúffuna og bakið í 7-8 mín., látið kólna í 10-15 mín. Setjið bökunarpappírsörk á borðið, stráið örlitlu af sykri á pappírinn og hvolfið botninum á hann. Rúllið botninum létt upp með bökunarpappírnum og geymið. Þetta er ekki nauðsynlegt ef þið setjið fyllinguna strax á kökuna. Rúllið kökubotninum út og setjið rjóma-bananablönduna á botninn. Rúllið tertunni upp og setjið á tertudisk. Setjið rjómarönd eftir endilangri kökunni, skreytið með banönum og súkkulaði og e.t.v. berjum.
Á milli og ofan á
4 dl rjómi, þeyttur
4 bananar
80 g súkkulaði, brætt
nokkur ber (má sleppa)
Takið frá svolítið af þeytta rjómanum til að setja ofan á. Stappið 3 banana og blandið saman við það sem eftir er af rjómanum og setjið á milli.
Umsjón: Sigríður Björk Bragadóttir
Mynd: Aldís Pálsdóttir