Grillaður fiskur er dýrindis máltíð

Þegar fiskur er grillaður festist hann fyrst við teinana en losnar frá þegar hann er tilbúinn og því mikilvægt að vera ekki að hreyfa við honum á meðan. Gott er að hafa grillið mjög heitt þegar fiskurinn er settur á en lækka svo hitann. Þegar grilla á fisk eru til ýmis áhöld sem hjálpa til við verkið eins og grillgrind, fiskiklemma eða álbakkar. Svo er líka hægt að grilla margar fisktegundir með því að setja þær beint á grillið eins og við gerum hér. Best er að grilla stinnan fisk ef hann er settur beint á grillið, sérstaklega fyrir byrjendur. Þá eru fisktegundir eins og hlýri, langa, bleikja, lax, steinbítur, keila, skötuselur eða lúða góðar tegundir. Grindin þarf að vera vel heit og olíuborin og svo er fiskinum skellt á grindina. Dýrindis máltíð á góðum sumardegi með salati og léttri sósu.