Mið-austurlenskur veislumatur.
Grillaður halloumi-ostur
fyrir 3-4
2 pakkningar halloumi-ostur
2 msk. ólífuolía
svartur pipar
chili-flögur
Hitið grillið að meðalháum hita. Þerrið halloumi-ostinn vel með eldhúspappír og penslið hann síðan með ólífuolíu. Grillið í 3-4 mín. Á hvorri hlið eða þar til osturinn er orðinn fallega gylltur. Flytjið yfir á disk, sáldrið mikið af ólífuolíu yfir ásamt möluðum svörtum pipar og chili-flögum. Berið strax fram.
Kúskús með karamelliseruðum lauk, kirsuberjatómötum og kryddjurtum
fyrir 4-6
250 g kirsuberjatómatar
2 rauðlaukar, þunnt sneiddir
2 tsk. hunang
2 tsk. kumminduft
60 g þurrkaðar apríkósur, skornar í litla bita
30 g þurrkuð trönuber
500 g kúskús
800 ml sjóðandi vatn
2 msk. ólífuolía
1 tsk. salt
25 g smjör, skorið í bita
1 agúrka, skorin í bita
100 g pistasíuhnetur, ristaðar á pönnu og saxaðar
50 g blandaðar ferskar kryddjurtir, t.d. kóríander, dill og/eða steinselja, söxuð
safi úr 1 sítrónu, eða meira eftir smekk
granateplafræ, má sleppa
Hitið ofn í 200°C. Skerið kirsuberjatómatana í tvennt og setjið á ofnplötu, dreifið smávegis ólífuolíu yfir og sáldrið 1 msk. af grófu sjávarsalti yfir. Bakið í miðjum ofni þar til tómatarnir linast og hýðið fer að losna frá. Takið úr ofninum og lækkið hitann niður í 140°C. Hitið ólífuolíu á pönnu og bætið við lauk, hunangi og kummindufti ásamt salti og pipar.
Eldið þar til laukurinn er orðinn dökkur og mjög mjúkur, u.þ.b. 15-20 mín. Takið af hitanum og hrærið apríkósubita og trönuber saman við, setjið til hliðar. Takið fram mót sem er u.þ.b. 20×30 cm stórt. Hellið kúskúsinu út í formið ásamt ½ tsk. af salti, blandið saman og sléttið.
Hellið 800 ml af sjóðandi vatni yfir kúskúsið, sáldrið smávegis ólífuolíu yfir, hrærið og hyljið síðan með álpappír, gætið þess að þjappa álpappírnum þétt með fram hliðum formsins.
Látið standa í 10 mín., setjið síðan smjörteningana út í kúskúsið og lokið aftur þétt með álpappírnum og bakið í miðjum ofni í 20 mín. Fjarlægið úr ofninum og rakið í gegnum kúskúsið með gaffli til að losa um alla köggla, látið kólna í smástund og setjið síðan í stóra skál. Bætið rauðlauknum, trönuberjunum og apríkósunum saman við og hrærið. Bætið kirsuberjatómötum, agúrku, pístasíuhnetum og megninu af kryddjurtunum og hrærið varlega saman.
Hrærið saman sítrónusafa, ólífuolíu, salt og pipar saman, smakkið og blandið saman við kúskúsið. Sáldrið afganginum af kryddjurtunum yfir ásamt granateplafræjunum áður en salatið er borið fram.
Umsjón / Nanna Teitsdóttir
Stílisti / Hanna Ingibjörg Arnarsdóttir
Myndir / Hallur Karlsson