Tilvalið er að setja fisk á grillið enda er hann hollur og einstaklega ljúffengur og sáraeinfalt að grilla hann. Til eru ýmis áhöld sem hjálpa til við verkið eins og grillgrind, fiskiklemma eða álbakkar en einnig er hægt að grilla margar fisktegundir með því að setja þær beint á grillið. Þá er best að grilla stinnan fisk eins og hlýra, löngu, bleikju, lax, steinbít, keilu, skötusel eða lúðu. Grindin þarf að vera vel heit og olíuborin áður en byrjað er að grilla.
Grillað skötusels og chorizo-kebab
8-10 pinnar
8-10 grilltrépinnar
3-4 msk. ólífuolía
2 msk. smjör, bráðið
1 tsk. chiliflögur
1 tsk. tímían
2 tsk. rósapipar, steyttur
salt og pipar eftir smekk
500 g skötuselur, í munnstórum bitum
12 sérrítómatar
300 g chorizo-pylsa, skorin í sneiðar
2 rauðlaukar, skornir í báta
hnefafylli steinselja, söxuð, má sleppa
safi úr hálfri sítrónu
Látið grillpinnana liggja í vatni á meðan þið útbúið matinn. Blandið ólífuolíu, smjöri, chiliflögum, tímían og rósapipar í skál og setjið fiskinn saman við. Látið marinerast í 30 mín. Þræðið 3 bita af fiski, 2-3 tómata, 2-3 pylsubita og 1-2 laukbita á hvern pinna. Grillið í 2-3 mínútur á hvorri hlið en passið að ofgrilla fiskinn ekki. Dreypið sítrónusafa yfir hvern pinna og stráið steinselju yfir. Berið fram með salati og sítrónubátum og ef til vill grillaðri kartöflu og góðri sósu.