Það er lítið mál að baka pítsur á grillinu. Það þarf þó að hafa í huga að grillið er miklu heitara en ofninn og því þarf að fylgjast vel með bakstrinum.
Við bakstur á grillinu er best að vera með stillt á meðalhita. Það má setja pítsur beint á grillgrindina en ef langt bil er á milli rimlanna er ráð að hafa pítsubotnana þykkari svo þeir tolli betur á grindinni. Mjög gott er að grilla pítsuna á pítsusteini ef þið eigið svoleiðis.
Pítsa með banönum og pekanhnetum
1 uppskrift pítsudeig
1 uppskrift brúnkudeig
2-3 bananar, skornir í sneiðar
50 g pekanhnetur
2-3 msk. kókosmjöl
Setjið pítsudeigið á grillið og grillið í 1- 2 mín. Snúið pítsunni við, jafnið úr brúnkudeiginu á botninn, skiljið 1-2 cm eftir við kantinn. Raðið banönum á deigið, stráið pekanhnetum og kókosmjöli ofan á. Grillið með lokið á í 3-5 mín. eða þar til kantarnir eru farnir að taka lit.
Pítsudeig
3 dl fingurvolgt vatn (38°C)
1 tsk. salt
1 msk. olía
3 tsk. þurrger
1 msk. sykur
250 g hveiti
200 g heilhveiti
Heilhveiti eða semolina-hveiti til að fletja út með.
Hrærið vatn, salt, olíu, þurrger og sykur saman í skál og látið bíða í 5 mín. Bætið hveiti og heilhveiti saman við og hnoðið deigið mjög vel saman. Látið deigið hefast í 30 mín. á hlýjum stað. Deigið má gera daginn áður og láta hefast í kæliskáp yfir nótt.
Myndir / Karl Petersson
Stílisti / Ólöf Jakobína Ernudóttir