Ljúffengur réttur sem óhætt er að mæla með.
Ítalskt nautaragú með tagliatelle
fyrir 4-5
1 kg nautagúllas
1 dl hveiti
100 g beikon, skorið í bita
3 msk. ólífuolía
2 laukar, saxaðir
1 sellerístilkur, saxaður
1 stór gulrót, skræld og söxuð
500 ml rauðvín
2 stönglar ferskt rósmarín
2 þurrkuð lárviðarlauf
4 stönglar ferskt tímían
1 dós eða krukka (400 g) niðursoðnir heilir tómatar eða heilir kirsuberjatómatar
2 tsk. salt
2 tsk. pipar
500 g ferskt eða þurrkað tagliatelle
parmesanostur, rifinn og magn eftir smekk
Setjið hveitið í fat og setjið 1 tsk. af salti og 1 tsk. af pipar saman við. Veltið kjötbitunum upp úr hveitinu og setjið til hliðar. Takið fram stóran pott með loki og hitið olíuna í pottinum yfir meðalháum hita. Steikið nautagúllasið þar til það brúnast á öllum hliðum, takið úr pottinum og setjið til hliðar. Steikið beikonið þar til það fer að brúnast, bætið þá lauk, selleríi og gulrót saman við og steikið þar til grænmetið er orðið mjúkt og laukurinn farinn að gyllast, u.þ.b. 10 mín. Setjið kjötið í pottinn og hellið rauðvíninu út í og hækkið hitann til að sjóða vínandann úr, u.þ.b. 3-4 mín. Setjið rósmarín, lárviðarlauf, tímían og tómata í pottinn ásamt salti og pipar. Lækkið hitann undir pottinum, setjið lokið á og látið malla þar til kjötið er orðið alveg meyrt og sósan farin að þykkna, u.þ.b. 2 tíma. Kíkið ofan í pottinn af og til og bætið við smávegis vatni ef sósan virðist of þykk. Gott er að smakka sósuna og bragðbæta með salti og pipar. Takið pottinn af hitanum og rífið kjötið niður með því að tosa það í sundur með tveimur göfflum. Veiðið rósmarín- og timíanstönglana ásamt lárviðarlaufunum upp úr pottinum og hendið. Setjið rifna kjötið aftur í sósuna og látið pottinn yfir lágan hita til að halda heitu.
Sjóðið tagliatelle samkvæmt leiðbeiningum á pakkningu og berið fram með kjötsósunni ásamt parmesanosti og góðu grænu salati.
Umsjón / Nanna Teitsdóttir
Stílisti / Hanna Ingibjörg Arnarsdóttir
Myndir / Hákon Davíð Björnsson