Þessi kínóapítsa með hvítlauksrjómaosti, villisveppum og tímíani er einstaklega girnileg. Botninn er án hveitis og einstaklega ljúffengur.
3-4 litlar pítsur
Hér þarf að undirbúa sig, leggja þarf kínóa í bleyti yfir nótt og villisveppina í sjóðandi heitt vatn í a.m.k. 1 klst.
3 dl kínóa
1 tsk. þurrkuð basilíka
1 tsk. salt
1 hvítlauksgeiri, fínt rifinn
1-2 dl vatn
Leggið kínóa í bleyti yfir nótt. Sigtið vatnið frá og skolið kínóa vel. Setjið í matvinnsluvél með restinni af hráefninu og látið hana ganga þar til blandan er mjúk og líkist pönnukökudeigi. Bætið vatni við ef þarf.
Hitið ofn í 220°C. Setjið pottjárnspönnu eða eldfast mót með vel af olíu inn í ofninn og látið hitna vel. Takið út og hellið deigi í, þetta á að frekar þunnt, líkt og pönnukaka. Bakið í 10-15 mín. takið þá út og snúið botninum við, bakið áfram í 5-10 mín. Setjið botninn þá á bökunarpappírsklædda ofnplötu eða hafið hann áfram í pönnunni.
Smyrjið ostablöndunni á botninn og dreifið sveppum og heslihnetum yfir ásamt tímíani og rifnum osti. Bakið þar til osturinn hefur tekið fallegan lit.
Ostablanda:
6-8 msk. mascarpone-ostur, eins má nota rjómaost
1-2 hvítlauksgeirar, fínt rifnir
1 tsk. þurrkuð basilíka
1 tsk. þurrkað tímían
1 tsk. þurrkað oregano
1 tsk. salt
Blandið öllu saman og bragðbætið með salti og pipar. Þynnið með örlitlu af vatni, t.d. af villisveppunum, til þess að auðvelt sé að dreifa ostablöndunni á botninn.
Ofan á: 1 dós þurrkaðir villisveppir
1 msk. olía
2 hvítlauksgeirar, fínt rifnir
3-4 msk. gróft saxaðar heslihnetur
2-3 greinar ferskt tímían
3-4 msk. rifinn ostur
Látið sveppina í skál og hellið sjóðandi vatni yfir, látið liggja í u.þ.b.1 klst. Sigtið vatnið frá og steikið sveppina upp úr olíunni í 5-10 mín.
Bætið þá hvítlauk saman við og steikið áfram í nokkrar mínútur. Bragðbætið með salti og pipar. Setjið sveppina á pítsuna ásamt heslihnetum og tímíani, dreifið örlitlu af rifnum osti yfir ef vill.
Bakið þar til osturinn hefur tekið fallegan lit.