Þennan rétt má bæði bera fram kaldan og heitan en ég legg upp með að hér séu lærin borin fram köld til þess að einfalda undirbúning og má elda þau degi á undan og setja svo í kæli en auðvitað má bera þau fram heit. Góð gráðostaídýfa í léttari kantinum passar vel með til að dýfa þeim í.
Kjúklingalæri í texashjúp
4 kg kjúklingalæri
3 msk. olía
20 dropar tabasco-sósa
2 tsk. reykt paprika
4 tsk. hvítlauksduft
2 tsk. laukduft
2 tsk. paprikuduft
1 tsk. chili-duft
2 msk. salt frá Saltverki
1 msk. svartur pipar
Hitið ofninn í 175°C. Blandið öllum kryddunum saman, hellið olíunni yfir kjúklinginn og kryddið, nuddið kryddunum vel inn í kjúklinginn. Ekki er verra að leyfa maríneringunni að liggja í 5-6 tíma áður en lærin eru elduð.
Komið kjúklingnum fyrir í eldföstu móti og setjið inn í miðjan ofninn í 35 mín. eða þar til kjarnhitinn hefur náð 69°C. Berið fram með uppáhaldsídýfunni ykkar, ég mæli með gráðostaídýfu hér að neðan.
Gráðostaídýfa
1 dós grískt jógúrt
1 dós lífrænt jógúrt frá BíóBú
160-200 g gráðostur, rifinn niður
safi og börkur af 1 límónu
4 vorlaukar, mjög fínt skornir
4 dropar tabasco-sósa
salt og pipar
Blandið öllu saman þar til gráðosturinn hefur blandast vel við jógúrtið og allt verður silkimjúkt.
Umsjón / Hinrik Carl Ellertsson
Stílistar / Sigríður Björk Bragadóttir og Katrín Rut Bessadóttir
Myndir / Hákon Davíð Björnsson