Brauðtertur eru sívinsælar og slá alltaf í gegn. Það er bara eitthvað við majónes og brauð sem fólki líkar. Svo eru þær líka svo fallegar og girnilegar. Hér er flott útfærsla á einni með reyktum laxi.
Lúxusbrauðterta með reyktum laxi
fyrir 12-14
1 brauðtertubrauð
150 g rjómaostur
100 g 18% sýrður rjómi
1-2 msk. majónes
rækjusósa (sjá uppskrift)
½ gúrka, skorin í þunnar sneiðar
u.þ.b. 6 msk. mjúkt smjör
u.þ.b. 150 g reyktur lax, þunnt skorinn
sinnepssósa (sjá uppskrift)
4-6 msk. majónes
3-4 stk. harðsoðin egg, skorin í sneiðar
Ofan á
1-2 stk. harðsoðin egg, skorin í báta
ferskt dill
sítrónusneiðar
rækjur
reyktur lax
fersk steinselja
blóm ef vill, hér voru notuð blóm af blaðsalati
Skerið skorpuna af brauðinu og setjið til hliðar (skorpan er notuð í brauðstangir sem raðast utan um brauðtertuna). Hrærið saman rjómaost, sýrðan rjóma og majónes þar til blandan er slétt og felld. Þetta er gott að gera í hrærivél eða matvinnsluvél. Setjið brauðsneið á disk og dreifið rækjusósu ofan á. Raðið þunnum gúrkusneiðum ofan á og leggið aðra brauðsneið yfir. Smyrjið hana með smjöri og raðið reyktum laxi ofan á. Dreifið sinnepssósu yfir laxinn. Setjið brauðsneið ofan á, smyrjið hana með majónesi og raðið eggjasneiðum ofan á. Leggið aðra brauðsneið ofan á og endurtakið frá byrjun. Smyrjið alla brauðtertuna með rjómaostablöndunni og setjið hana gjarnan í kæli í 1-2 klst. Raðið ristuðum skorpubitum utan um kökuna og skreytið að vild.
Sinnepssósa
2 msk. dijon-sinnep, við stofuhita
1 msk. sykur
1 tsk. sinnepsduft
1 dl bragðlítil olía
Setjið sinnep, sykur og sinnepsduft saman í skál (gott að nota nokkuð víða skál) og pískið saman. Hellið olíu saman við í dropatali til að byrja með og pískið af fullum krafti, látið þá olíuna út í í lítilli bunu og haldið áfram að píska. Þetta er sama aðferð og notuð er þegar búið er til majónes.
Rækjusósa
400 g rækjur
1 dl majónes
1 dl sýrður rjómi
1 msk. saxaður rauðlaukur
safi úr ½ límónu
2-3 msk. saxaður graslaukur og/
eða dill
gróft sjávarsalt
hvítur pipar
Takið gjarnan nokkrar rækjur frá til þess að skreyta með. Kreistið eins mikið vatn úr rækjunum og hægt er. Setjið allt saman í matvinnsluvél og látið ganga þar til allt er slétt og fellt.
Brauðstangir
skorpan af brauðinu
2 msk. ólífuolía
3-4 msk. pestó að eigin vali
Hitið ofn í 200°C. Setjið olíu og pestó saman í skál og veltið skorpunni létt upp úr leginum. Raðið á bökunarpappírsklædda ofnplötu og bakið í 5-10 mín. eða þar til skorpan hefur ristast fallega. Látið kólna. Skerið í hæfilega langa bita til þess að raða utan um brauðtertuna.
Umsjón: Kristín Dröfn Einarsdóttir
Myndir: Heiðdís Guðbjörg Gunnarsdóttir