Ljúffengur réttur sem fellur inn í ketó-mataræðið.
Ostatortilla með kjúklingi og steiktu rósakáli
fyrir 2-3
3 msk. beikonkurl eða 3 sneiðar
beikon
1 dl grænar ólífur, saxaðar,
1 tsk. chili-flögur
1 msk. harissamauk
3 msk. rjómi
50 g fetaostur
hnefafylli steinselja, söxuð
100 g kjúklingakjöt að eigin vali, t.d.
afgangur af kjöti af heilum kjúklingi
1 ½ bolli mozzarella-ostur
1 ½ bolli cheddar-ostur
Hitið ofninn 200°C. Brúnið beikonkurlið á pönnu og bætið síðan ólífum, harissamauki, chili-flögum og rjóma saman við og hrærið, látið malla í smástund og setjið svo fetaost, steinselju og kjúklingakjöt út á pönnuna og hitið í 3-4 mín. Takið af hellunni. Blandið mozzarella- og cheddar-osti saman og myndið hring (um 12 tommu stóran) á smjörpappír og setjið í ofnskúffu. Bakið ostatortilluna í 5 mín., takið út. Gott er að steikja rósakálið á meðan. Setjið allt sem er á pönnunni á helming tortillunnar og leggið saman, skerið í bita og berið steikta rósakálið fram með.
Steikt rósakál
1 msk. ólífuolía
1 poki rósakál, skorið í tvennt
½ tsk. reykt paprikukrydd
1 tsk. sjávarsalt
Steikið rósakálið upp úr ólífuolíunni þar til það fer að brúnast vel en ekki lengur en 6-7 mín. svo það haldist smábit í því, kryddið með paprikukryddi og salti. Berið fram með ostatortillunni.
Stílisti / Hanna Ingibjörg Arnarsdóttir
Myndir / Hallur Karlsson