Taco er afar fjölbreytt enda möguleikarnir óendanlegir þegar kemur að því að setja hráefni ofan á tortillurnar en taco hefur notið mikilla vinsælda víða um heim enda þægilegur, einfaldur og góður matur. Hér kemur uppskrift að tacos með kjötbollum og geggjaðri chipotle-salsa.
Tacos með kjötbollum, reyktu chipotle-salsa og rauðlauk
fyrir 4
500 g nautahakk
½ laukur, saxaður smátt
3 hvítlauksgeirar, smátt saxaðir
40 g brauðrasp
3 msk. steinselja, söxuð
1 tsk. salt
½ tsk. svartur pipar
2 tsk. karrí
2 msk. olía til steikingar
1 dós tómatar
1 ferskt, rautt chili-aldin, saxað smátt
2 msk. ferskt kóríander, fínt saxað
Blandið nautahakki, lauk, hvítlauk, brauðraspi, salti, pipar og karríi í skál og blandið vel. Búið til bollur úr deiginu. Brúnið þær í 3-4 mín. og takið af pönnunni. Setjið tómata, kóríander og chili-aldin í blandara.
Hellið helmingnum á pönnuna og setjið kjötbollurnar saman við, smakkið til með salti og pipar. Látið malla í nokkrar mín. Berið hinn helminginn fram með tortillakökunum ásamt lauk og sýrðum rjóma.
Skerið t.d. niður radísur, hvítan lauk og kóríander og berið einnig fram með matnum.
Rauðlaukur
½ rauðlaukur, sneiddur
1 tsk. chili-flögur, steyttar
safi úr 2 límónum
¼ tsk. salt
Blandið öllu saman og látið standa í 2-3 klst. fyrir framreiðslu.
Reykt chipotle-salsa
100 g tómatar, skornir í bita
½ laukur, saxaður
2 tsk. chili-flögur
2 tsk. chipotle-mauk
2 msk. agave-síróp
2 tsk. sjávarsalt
50 ml hrísgrjónaedik
1 tsk. salt
½ tsk. nýmalaður pipar
1 tsk. kumminduft
Setjið tómata, lauk og 250 ml vatn í pott. Látið sjóða í 5 mín. hellið vatninu frá og setjið til hliðar. Hitið olíu á pönnu og setjið chili-flögurnar út á og steikið í nokkrar sekúndur.
Blandið síðan tómötunum og lauknum saman við og setjið í matvinnsluvél og látið allt annað saman við og blandið vel. Hellið í pott og bætið 100 ml af vatni saman við ef blandan er of þykk. Smakkið til með salti og pipar. Salsað er best framreitt kalt.
Stílisti / Hanna Ingibjörg Arnarsdóttir
Myndir / Hákon Davíð Björnsson