Fátt er skemmtilegra en að búa til sinn eigin eftirrétt og bjóða upp á undir berum himni. Það er ekki eins flókið og það lítur út fyrir að vera að búa til sinn ís sjálfur. Kosturinn við þessa uppskrift er að hægt er að gera hana nokkrum dögum áður en hún er borin fram.
Ísterta
10-12 sneiðar
½ msk. mjúkt smjör (til þess að smyrja form)
3 eggjahvítur
150 g flórsykur
150 g hakkaðaðar valhnetur
150 g suðusúkkulaði
4 eggjarauður
4 msk. sykur
3 dl rjómi
2 dl rjómi
200-300 g fersk ber
Hitið ofn í 180°C. Setjið bökunarpappír í botninn á smelluformi sem er 22-24 cm í þvermál. Smyrjið bæði pappír og hliðar létt með smjöri. Þeytið eggjahvítur þar til þær byrja að freyða. Bætið þá flórsykri saman við í litlum skömmtum og þeytið vel á milli. Haldið áfram að þeyta á fullum hraða þar til blandan er stíf og glansandi og hreyfist ekki til í skálinni sé henni hallað.
Blandið valhnetum varlega saman við með sleikju og dreifið í formið. Bakið í 20-25 mín. Látið botninn vera í forminu og látið hann kólna alveg.
Bræðið súkkulaði yfir vatnsbaði og látið kólna lítillega. Þeytið eggjarauður og sykur saman þar til blandan verður létt og ljós. Hellið þá súkkulaðinu saman við og blandið vel. Þeytið 3 dl af rjómanum, takið væna slettu af honum og blandið saman við súkkulaðiblönduna til þess að losa aðeins um hana.
Blandið síðan varlega saman við restina af rjómanum og setjið ofan á botninn í forminu. Látið álpappír yfir og frystið í a.m.k. 6 klst., gjarnan yfir nótt. Losið kökuna úr forminu með því að skera meðfram henni í forminu (gott er að dýfa hnífnum í heitt vatn). Þeytið 2 dl af rjóma, setjið ofan á kökuna ásamt ferskum berjum þegar hún er borin fram.