Veitingastaðir skella, hver af öðrum, tímabundið í lás: „Þetta er erfið ákvörðun“

Veitingastaðir tilkynna nú hver að öðrum tímabundnar lokanir en hert samkomubann, sem tekur gildi á miðnætti í kvöld, var boðað í gær. Sumir staðir bjóða enn upp á „take-away“ eða heimsendingaþjónustu.

„Í ljósi fordæmalausra aðstæðna höfum við ákveðið að loka Tapas Barnum tímabundið frá og með deginum í dag. Þetta er erfið ákvörðun en á endanum er heilsa og öryggi okkar gesta og starfsmanna í forgangi,“ segir á Facebook-síðu Tabasbarsins. „Við munum ennþá bjóða upp á okkar sívinsælu veisluþjónustu með dagsfyrirvara, hægt er að panta í gegnum [email protected] eða hér á Facebook. Við þökkum skilninginn og getum ekki beðið eftir að opna aftur og taka á móti ykkur öllum með gleði í hjarta þegar þetta er staðið yfir.“

Kæru gestir og vandamenn, þið vitið hvað klukkan slær. Við neyðumst til að loka frá klukkan 15.00 í dag 23. mar í óákveðinn tíma. Verum góð við hvert annað. Sjáumst á hinum endanum,“ segir í tilkynningu frá Snaps Bistro Bar.

Á Facebook-síðu Skál! er tekið fram að nú séu uppi aðstæður sem reyni á okkur öll að standa saman. Þessar aðstæður komi niður á því sem veitingahúsin standi fyrir; þjónustu, nánd og gestrisni.
„Það er okkar mat að ekki sé hægt að framfylgja samkomubanni og á sama tíma að veita þá þjónustu og upplifun sem Skál! stendur fyrir. Nú er gríðarlega mikilvægt að virða skipun um fjarlægðarmörk sem sett eru á skv. samkomubanni til að reyna að halda þeirri vá í skefjum sem við stöndum frammi fyrir sem samfélag … Það er samfélagslega mikilvægt að við stöndum saman um almannavarnir og við viljum ekki á neinn hátt ganga gegn því,“ segir meðal annars í tilkynningu frá starfsfólki Skál!

Starfsfólk veitingastaðarins Fjallkonunnar tekur í svipaðan streng. „Í ljósi fordæmalausra aðstæðna höfum við ákveðið að loka tímabundið frá og með deginum í dag. Þetta er erfið ákvörðun en á endanum er heilsa og öryggi okkar gesta og starfsmanna í forgangi. Við þökkum skilninginn og getum ekki beðið eftir að opna aftur og taka á móti ykkur öllum með gleði í hjarta þegar þetta er staðið yfir. Þá verður sko gaman.“

Og á Facebook-síðu veitingastaðarins Geiri Smart segir meðal annars: Vegna þeirra aðstæðna sem nú eru í samfélaginu höfum við tekið þá erfiðu ákvörðun að loka tímabundið veitingastaðnum okkar. En við erum bjartsýn og verðum vonandi komin aftur á fullt skrið áður en langt um líður. Verum skynsöm, þvoum hendur og notum spritt. Við hlökkum til að taka á móti ykkur með hækkandi sól.“

„Skrítnir tímar, ekki satt?“ segir á Facebook-síðu Slippbarsins. „Okkur þykir það svaka leitt að láta ykkur vita að Slippbarinn er nú tímabundið lokaður út af þessu ástandi sem nú ríkir. Við erum hins vegar bjartsýn og vonumst til að vera komin aftur á barinn og í eldhúsið áður en langt um líður. Verum skynsöm, þvoum hendur, notum spritt og umfram allt, töpum ekki gleðinni.“

Á veitingastaðnum Coocoo’s Nest er búið að kynna breytt fyrirkomulag. „Kæru viðskiptavinir frá og með þriðjudeginum 24. mars verður einungis hægt að panta mat til að taka með sér heim. Við munum kynna hér á samfélagsmiðlum matseðlana hverju sinni. Hádegisverður í boði milli 11:00-15:00 & kvöldverður milli 18:00-21:00. Heimsending er frí ef verslað er fyrir 6.000 kr eða meira … Með þessari aðgerð náum við að vernda okkar starfsfólk sem og landsmenn alla í átakinu við að takast á við þessar aðstæður. Þökkum skilning & stuðning. Þeir sem eru í sóttkví og vilja sækja geta millifært á okkur og hringt við komu sog við afhendum utandyra,“ segir meðal annars á Facebook-síðu Coocoo’s Nest.

„Vegna aðstæðna í samfélaginu verður Jómfrúin lokuð fyrir venjulega starfsemi f.o.m. 23. mars þar til línur skýrast að nýju,“ segir í tilkynningu veitingastaðarins Jómfrúarinnar. „Við munum hins vegar bjóða upp á „take-away“ og heimsendingu alla fimmtudaga – sunnudaga fyrir fyrirtæki og einstaklinga í síma 5510100 og á [email protected] … Höfum „hygge“ í hávegum og förum varlega,“ og undir þetta skrifar Jómfrúarteymið.