Íslensku handboltalandsliðin munu ekki leika í búningum með merki Rapyd á frá 1. september en leikmenn íslenska kvennalandsliðsins huldu merki ísraelska fyrirtækisins í myndatöku þegar þær tryggðu sér sæti á HM í apríl.

Samstarf HSÍ við Rapyd hefur verið umdeilt síðan Arik Shtilman, forstjóri móðurfélags Rapyd, lét hafa eftir sér að hann styddi allar aðgerðir Ísrael á Gaza en hann er sjálfur frá Ísrael. Samkvæmt tilkynningu HSÍ lýkur samstarfinu formlega 1. september.

„Við erum afar stolt af áratuga löngum stuðningi okkar við handknattleikssambandið. Íslenskur handknattleikur hefur náð eftirtektarverðum árangri og borið hróður Íslands um allan heim. Nú er komið að leiðarlokum hjá okkur og við óskum íslenskum handknattleik velfarnaðar. Við hlökkum til að fylgjast með okkar frábæra handknattleiksfólki í framtíðinni, nú á hliðarlínunni,“ sagði Garðar Stefánsson, forstjóri Rapyd á Íslandi, um málið.

„Samstarf HSÍ við Rapyd hefur verið handknattleikssambandinu afar mikilvægt. Stuðningur Rapyd hefur skipt sköpum fyrir rekstur landsliðanna og verkefni þeirra á undanförnum árum. Við erum þakklát fyrir þann tíma sem Rapyd hefur verið hluti af þeim mikla árangri sem landsliðin okkar hafa náð og þökkum þeim innilega fyrir stuðninginn,“ sagði Jón Halldórsson formaður HSÍ.