Fjárfestingarfélagið Skel hefur keypt rúm 9% í Sýn og er sá hlutur metinn á rúmlega hálfan milljarð króna. Félagið á nú rúm 10% í Sýn. Þetta kemur fram í tilkynningu til Kauphallar.

Ingibjörg Pálmadóttir, eiginkona Jóns Ásgeir Jóhannessonar, er einn af stærstu eigendum Skeljar í gegnum eignarhald á félaginu Streng ehf. sem á helming í Skel á móti lífeyrissjóðum og fleiri. Í dag er Jón Ásgeir stjórnarformaður Skeljar. Þetta markar ákveðna endurkomu þar sem þau hjónin seldu einmitt fjölmiðlahluta Sýnar á sínu tíma.

Lífeyrissjóður verzlunarmanna seldi allan sinn hlut til Skeljar í vikunni. Sá hlutur var 5,67% en ekki liggur fyrir hver eða hverjir seldu hin rúmu 3% sem Skel keypti.

Gengi hlutabréfa í Sýn hafa eftir daginn í dag fallið um þriðjung á einu ári. Í dag hækkaði gengið hins vegar um 16%. Óvissa hefur verið í kringum áform félagsins síðustu misserin og hefur starfsmannaflótti frá Sýn verið áberandi í fjölmiðlum á árinu. Sýn sendi frá sér afkomuviðvörun 10. febrúar síðastliðinn vegna versnandi horfa.

Í vikunni var einnig tilkynnt að nýr stjórnarmaður kæmi inn í félagið á föstudag. Það er Heiðrún Lind Marteinsdóttir, sem einnig er framkvæmdastjóri Samtaka fyrirtækja í sjávarútvegi.

Sýn gefur meðal annars út Vísi.is, Stöð 2, Bylgjuna og FM-957.