Sagnfræðingurinn Valur Gunnarsson hefur birt harðorða Facebook-færslu þar sem hann gagnrýnir ákvörðun íslenskra stjórnvalda um að vísa rússneskri fjölskyldu úr landi, þrátt fyrir að faðirinn hafi setið í fangelsi fyrir andóf gegn stjórnvöldum í Rússlandi og að móðirin sitji nú ein uppi með unga tvíbura í óvissu. Valur segir Ísland hafa brugðist í máli fjölskyldunnar og spyr hvort þjóðin hafi í raun kosið að taka að sér „skúrkshlutverkið“ í þessari sögu.

Valur, sem meðal annars dvaldi í Úkraínu í upphafi stríðsins þar, skrifaði harðorða Facebook-færslu vegna fréttar Vísis um hjónin Gadzhi Gadzhiev og Mariiam Taimova, sem eru upprunalega frá Rússlandi og flúðu þaðan eftir að Gadzhiev hafði setið í fangelsi fyrir að mótmæla stjórnvöldum í Rússlandi. Samkvæmt fréttinni hefur fjölskyldan verið sundruð eftir að íslensk yfirvöld ákváðu að reka fjölskylduna úr landi en þau höfðu sótt um hæli hér á Íslandi. Voru þau send til Króatíu, þar sem þau höfðu haft viðkomu á leið sinni til Íslands. Faðirinn er nú í hungurverkfalli á meðan eiginkona hans er ein með unga tvíbura þeirra.

Í upphafi færslu Vals fer hann yfir upphaf málsins:

„Gadzhi Gadzhiev eyddi fimm árum í fangelsi í Síberíu fyrir að mótmæla morðóðum stjórnvöldum í Moskvu. Þegar hann kom út tókst honum að fara til Tyrklands á nýjum skilríkíkjum ásamt konu og barni. Þaðan fóru þau í gengum Króatíu til Íslands, þar sem systini hans og móðir biðu og höfðu þegar fengið vernd. Ofan á allt fæddust hjónunum tvíburar. Hér hefði átt að vera hamingjusami endirinn á sögunni. En nei.“

Segir Valur í seinni hluta færslunnar að yfirvöld á Íslandi hafi ákveðið að taka að sér að vera skúrkar í málinu og reka fjölskylduna úr landi.

„Íslensk yfirvöld ákváðu nú að taka skúrkshlutverkið að sér. Fjölskyldan var rekin úr landi, þar á meðal tvíburarnir nýfæddir á Íslandi. Faðirinn er nú í hungurverkfalli á flóttamannamiðstöð í Króatíu. Ekki er alveg víst hvar móðirin er, en tvíburarnir eru enn vegabréfslausir og því í réttindarlegu limbó. Einhvern veginn finnst manni eins og það hefði ekki kostað Ísland svo ýkja mikið að vera góðu gæjarnir í sögu þessari. Er það þetta sem við viljum?“