Hljóðupptökur komu verkstæði í Garðabæ í koll

Bif­reiða­verk­stæðið Lyngási 12 ehf. hefur verið dæmt til að greiða fyrr­ver­andi starfs­manni sínum, Piotr Mickevick, tæp­lega 700 þús­und krónur í van­greidd laun auk 1,24 millj­óna króna í máls­kostnað. Dómur féll í Hér­aðs­dómi Reykja­ness 12. nóv­em­ber.

Piotr hóf störf hjá verk­stæð­inu í apríl 2023 en sagði upp í mars 2025. Samkvæmt ráðn­ing­ar­samn­ingi átti hann að starfa út apr­íl­mánuð. Ágrein­ingur kom hins vegar upp milli hans og fyr­ir­svars­manns fyr­ir­tæk­is­ins 1. apríl og mætti Piotr ekki aftur til vinnu.

Í mál­inu voru lagðar fram hljóð­upp­tökur af sam­skiptum mann­anna. Þar mátti meðal ann­ars heyra fyr­ir­svars­mann verk­stæð­is­ins segja:

„Já, ég vil að þú takir dót þitt og farir.“

Hann bætti síðar við:

„Ég vil að þú skiljir eftir lyk­il­inn þinn, takir dót þitt og farir.“

Piotr svar­aði þá:

„Þú varst að reka mig úr vinnu.“

Fyr­ir­svars­mað­ur­inn hafn­aði því og sak­aði starfs­mann­inn um að hafa hótað ofbeldi.

„Ég vil bara mína pen­inga,“ svar­aði Piotr, en ágrein­ingur hafði einnig verið um meinta skuld fyr­ir­tæk­is­ins við hann.

Fyr­ir­tækið hélt því fram fyrir dómi að Piotr hefði sjálfur ákveðið að hætta að mæta til vinnu. Dómurinn féllst hins vegar ekki á þá túlkun og taldi að honum hefði verið gert að yfir­gefa vinnu­stað­inn fyrir fullt og allt.

Verk­stæð­inu var því gert að greiða Piotr 699.777 krónur ásamt drátt­ar­vöxtum frá 1. maí 2025 og 1.240.000 krónur í máls­kostnað.