Ísraelsher hefur hafið nýja hernaðaraðgerð í miðhluta Gaza og hafa palestínskir íbúar flúið svæði í kringum Nuseirat-flóttamannabúðirnar. Að minnsta kosti þrír Palestínumenn hafa verið drepnir í aðgerðunum, samkvæmt heilbrigðisyfirvöldum.
Ísraelskir skriðdrekar voru á ferð í dag nærri Salah al-Din-götu, austan við Nuseirat-flóttamannabúðirnar og norðan við Bureij-búðirnar. Á sama tíma heyrðist skothríð frá drónum og sprengjuárásir á svæðinu.
Ísraelsher sagði að aðgerðin væri ætlað að „útrýma ógn“ við hermenn sína sem starfa vestan við svokallaða gula línu. Hún markar svæði sem Ísraelar hafa hernumið í Gaza og var komið á samkvæmt vopnahléssamkomulaginu frá október 2025.
Í yfirlýsingu hersins sagði að hann áskildi sér rétt til að framkvæma aðgerðir og hreyfa sig á svæðinu þegar þess væri þörf til að útrýma yfirvofandi ógn.
Al Jazeera greinir frá því að fjölskyldur hafi flúið norðurhluta Nuseirat-flóttamannabúðanna og svæði í nágrenni við hernaðaraðgerðirnar.
Mannskæðar árásir
Áður en Ísraelsher tilkynnti um nýju aðgerðina höfðu tvær drónaárásir í Gaza-ströndinni kostað að minnsta kosti tvo Palestínumenn lífið, samkvæmt upplýsingum frá sjúkrahúsum.
Al-Awda-sjúkrahúsið greindi frá því að einn hefði látist og fleiri særst í árás á Sheikh Ijlin-hverfið í suðvesturhluta Gaza-borgar. Al-Aqsa Martyrs-sjúkrahúsið tilkynnti um einn látinn í annarri árás í Deir al-Balah í miðhluta Gaza.
Heilbrigðisráðuneyti Gaza sagði að sjúkrahús hefðu skráð sjö dauðsföll og tekið á móti 15 særðum síðasta sólarhringinn. Sex þeirra hefðu verið drepnir í árásum Ísraela en einn látist af sárum sem hann hlaut í fyrri árás.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.






































Athugasemdir