Í færslunni segir: „BDSM búningar út um allt – nema hjá BDSM fólki? Á meðan Vogue gefur út BDSM/fetish verslunarleiðbeiningar þá gerðum við könnun í BDSM samfélaginu á BDSM búningum. Um það bil 60% aðspurðra eru oftast annað hvort naktir eða á nærfötunum í sínum BDSM leikjum. Tæp 12% eru í BDSM göllum og 2% bara á inniskónum.“ Svo er vísað á grein á vef Vogue um leiðarvísi um hvar sé best að versla BDSM fatnað.
Samkvæmt þessum niðurstöðum eru þá aðeins tæp 12% sem klæðast einhverskonar BDSM-klæðnaði.
Þess má geta að fyrr í vikunni birtist færsla á Facebook-síðunni BDSM á Íslandi undir yfirskriftinni „Það er ekkert til sem heitir BDSM klæðnaður“.
Færslan er birt í framhaldi af því að BDSM-félagið hefur verið dregið mikið inn í umræðuna í kringum sigur Hatara í Söngvakeppni sjónvarpsins. Það er vegna þess að margt fólk tengir atriðið við BDSM vegna búninganna sem meðlimir Hatara klæðast á sviðinu. Margir hafa þá velt sér fyrir sér hvort að atriðið gæti haft skaðleg áhrif á börn. Í færslu BDSM á Íslandi er tekið fram að fyrir börnum sé Hatarabúningur bara Hatarabúningur.
„Fyrir þeim eru Hatarabúningar ekkert annað en Hatarabúningar alveg eins og Súpermannbúningar eru Súpermannbúningar. Það eina sem gæti hugsanlega skaðað þau í sambandi við þetta væri ef einhver sem þau taka mark á bregst dæmandi eða harkalega við og kemur inn hjá þeim skömm sem þau skilja ekkert í, því þau hafa ekki þessa kynferðislegu tengingu. Mannssálin mótast af viðmóti annarra en ekki klæðnaði eða fylgihlutum. Það að klæða sig í leðurgalla eða latexsamfesting gerir mann ekki sjálfkrafa að BDSM-manneskju. Maður verður ekki slökkviliðsmaður við það eitt að fara í slökkviliðsbúning.“
Athugasemdir