Í nýrri grein á vef Félags atvinnurekenda (FA) er fjallað um hátt áfengisverð á Íslandi og þá staðreynd að í fjárlagafrumvarpi ársins 2020, sem nú er til umfjöllunar á Alþingi, er lagt til hækka áfengisgjald um 2,5%. FA gagnrýnir þessar áætlanir.
Í greininni er vísað í samanburð Eurostat þar sem kemur fram að áfengisverð á Íslandi 168% hærra en meðaltalið í Evrópusambandinu. Ólafur Stephensen, framkvæmdastjóri FA, segir skattlagningu á áfengum drykkjum á Íslandi vera „komna út fyrir öll velsæmismörk“.
„Það virðast engin takmörk fyrir því hvað stjórnmálamenn eru tilbúnir að skattpína kaupendur þessarar einu neysluvöru, eins og sífelldar hækkanir áfengisgjaldsins sýna og nú síðast áform um hækkun á álagningu ÁTVR. Vegna þess að áfengisgjaldið er föst krónutala á einingu áfengis, hafa hækkanir á því mest áhrif á ódýrustu tegundirnar og koma þannig harðast niður á þeim sem minnst hafa handa á milli. Þetta er stefna sem bitnar bæði á lífskjörum almennings og ferðaþjónustunni í landinu, enda trúa útlendingar varla sínum eigin augum þegar þeir koma í vínbúð eða á veitingastað og sjá verðið á áfengi. Við höfum talað fyrir daufum eyrum undanfarin ár, en teljum samt ástæðu til að spyrja enn og aftur: Ætlar enginn stjórnmálamaður að segja stopp; að nú sé komið nóg af þessari fáránlegu skattagleði,“ er haft eftir Ólafi í greininni.
Athugasemdir