Sema Erla sakar Pétur Jóhann, Björn Braga og Egil um rasisma og kvenfyrirlitningu

Sema Erla Serdar, stofn­andi hjálp­ar­sam­tak­anna Solaris, sakar Egil Ein­ars­son, einka­þjálf­ara með meiru og grínistana Pétur Jóhann Sig­fús­son og Björn Braga Arn­ars­son um (menn­ing­ar­legan) ras­isma og kven­fyr­ir­litn­ingu í nýj­ustu færslu sinni á Facebook.

Tilefnið er mynd­band sem Björn Bragi tók af Pétri Jóhanni á laug­ar­dag í fer­tugs­af­mæl­is­veislu Egils. Heyrist í Birni Braga hlæja og undir lok mynd­band­ins sést Egill hlæja að til­burðum Péturs Jóhanns. Aroni Pálm­ars­syni bregður síðan fyrir rétt undir lokin.

„Ég vil þakka Pétri Jóhanni, Birni Braga og Gillz fyrir þessa 12 sek­úndna inn­sýn í heim for­dóma, (menn­ing­ar­legs) ras­isma og kven­fyr­ir­litn­ingar á Íslandi í dag,“ segir Sema Erla og segir hún þre­menn­ing­ana vera stór­kost­legt dæmi um for­rétt­inda­blindu hvíta, mið­aldra karl­manns­ins sem trúir því virki­lega að það séu engir for­dómar eða ras­ismi á Íslandi.

„Og hann skilur bara ekk­ert í þessum látum öllum. Sjálfur er hann svo hrika­lega flottur og frá­bær og algjör­lega ómeð­vit­aður um sín for­rétt­indi og sitt fram­lag til þess að við­halda valda­kerfi og kúgun feðra­veld­is­ins, ras­ism­ans og hvítra yfir­burða að honum finnst þetta bara í lagi – þrátt fyrir umræð­una síð­ustu daga (þetta mynd­band er tekið upp um helg­ina)! Hann er svo blindur á sína for­rét­inda­stöðu að honum finnst þessi subbu­legi ras­ismi meira að segja eiga heima á inter­net­inu svo að sem flestir geti notið hans! Þvílík skömm að þess­ari ógeðs­legu rasísku hegðun,“ segir Sema Erla.

Finnst óþægilegt að dreifa rasismanum áfram

Hún segir að henni finn­ist óþægi­legt að dreifa slíkum ras­isma áfram, það sé þó nauð­syn­legt vegna stöðu þre­menn­ing­ana, sem eins og flestir vita eru þjóð­þekktir.

„Mér finnst óþægi­legra að hugsa til þess að fólk sé ekki með­vitað um rasíska hegðun þess­ara ein­stak­linga og eru jafn­vel að greiða þeim fyrir þjón­ustu eða greiða sig inn á „skemmt­anir“ hjá þeim án þess að vera með­vitað um inn­ræti þeirra og taka þar með þátt í að ýta undir það sem þeir aug­ljós­lega standa fyrir,“ segir Sema Erla.

Hún bætir við að ras­ismi sé aldrei ílagi, sama í hvaða formi hann birt­ist.

„P.s. Ef þú hugsar með þér „það má ekk­ert lengur“ eða „þetta er bara grín“ þá ertu hluti af vanda­mál­inu og þarft að fara í góða innri sjálfs­skoðun.“