Jói Fel í skugga gjaldþrots: „Ég veit ekki hvernig staðan er“

Bakarinn Jóhannes Felixson, eða Jói Fel eins og hann er gjarnan kall­aður, er ekki viss um hvernig mun fara fyrir bak­ar­í­unum sínum. Farið hefur verið fram á gjal­þrota­skipti í fyr­ir­tæk­inu. Bakarinn hefur áður misst bak­arí utan höf­uð­borg­ar­svæð­is­ins í gjald­þrot.

„Ef ég á að segja þér alveg eins og er þá veit ég ekki hver staðan er. Ég bara veit það ekki,“ segir Jói Fel í sam­tali við Mannlíf þegar hann er spurður út í stöð­una eftir að Líf­eyr­is­sjóður versl­un­ar­manna krafð­ist gjald­þrota­skipta hjá baka­rískeðj­unni. Ástæðan er van­gold­in iðgjöld sem fyr­ir­tækið hef­ur inn­heimt af laun­um starfs­fólks en ekki skilað til sjóðs­ins og hefur fyr­ir­tækið heldur ekki greitt mót­fram­lag sitt til sjóðs­ins af laun­um við­kom­andi starfs­manna.

Mál líf­eyr­is­sjóðs­ins var á dag­skrá Hér­aðs­dóm Reykja­víkur fyrr í mánuðnum en Jói segir stöð­una engu að síður frekar óljósa og getur illa gefið upp hvert fram­haldið verður. „Núna er ekk­ert að ger­ast. Ég er bara að bíða. Við þurfum að ræða betur saman þegar þetta kemur meira í ljós,“ segir Jói Fel.

Ef nið­ur­staðan yrði gjald­þrota bak­arískeðj­unnar yrði það ekki í fyrsta sinn hjá Jóa. Síðla sum­ars í fyrra var bak­arí í helm­ing­seigu hans úrskurðað gjald­þrota. Um var að ræða bak­aríið Guðni bak­ari á Selfossi sem Jói festi kaup á árið 2017 ásamt bak­arí­inu Kökuvali á Hellu. Hinu síð­ar­nefnda hefur einnig verið lokað.

Þegar utan­bæj­ar­bak­aríin lok­uðu ítrek­aði Jói að hann var aðeins helm­ings­eig­andi þeirra og að rekst­ur­inn hefði verið í ann­arra manna höndum. Rekst­ur­inn væri því ótengdur Jóa Fel bak­ar­ínum fjöl­mörgu í borg­inni sem nú virð­ast í vanda en óljóst hvernig fer á end­anum.