Þjóðþekkt miðbæjarfólk sakað um elítustæla: „Mér dettur ekki í hug að afgreiða sjálfan mig“

Það sauð upp úr í Facebook-hópi íbúa í Miðbænum í morgun og féllu ýmiss þung orð. Ástæðan er sjálfs­af­greiðsla í verslun Krón­unnar og ljóst er að sitt sýn­ist hverjum. Sumir segja það hneyksli að það sé ekki boðið upp á hefð­bundna afgreiðslu meðan aðrir telja það ein­fald­lega elítu­stæla.

Það var rit­höf­und­ur­inn Benóný Ægisson sem hóf umræð­una og skrif­aði: „Ég er dálítið hugsi yfir við­brögðum við nýju Krónu­versl­un­inni við Hall­veig­ar­stíg en margir segj­ast ætla að snið­ganga hana vegna þess að þar er bara sjálfs­af­greiðsla. Ég held að til að knýja fram breyt­ingar sé snið­ganga um það bil það versta sem fólk gerir. Sjáið bara ferða­manna­búð­irnar, ástandið þar sýnir að versl­anir þríf­ast ekki án heima­mark­að­ar­ins. Ég hef ýmis­legt að athuga við Krónu­búð­ina en ég vil frekar hafa hana en að hafa hana ekki.“

Sumir voru sam­mála honum og Guðrún Erla Geirs­dóttir vill ganga svo langt að senda bréf til Krónunar í nafni íbúa­sam­taka. Sú skrifar: „Hvað með að við í stjórn íbúa­sam­tak­anna sendum bréf/áskorun til þeirra sem reka Krónuna og förun fram á að tekið sé til­lit til þeirra íbúa hverf­is­ins sem kjósa að eiga fremur sam­skipti við mann­eskju en tölvu – þe það sem kallað er ,,sjálfa­f­greiðsla”“.

Skemmti­kraft­ur­inn Margrét Erla Maack tók illa í það. „Ekki í mínu nafni, takk. Það eina sem þarf að gera er að bæta við belti á eina mann­aða kass­ann“. Hún sagði svo að sjálfs­af­greiðsla skerpt neyt­enda­vit­und hennar. „Ég er svo þakk­lát fyrir þetta sjálfsa­f­reiðslu­sy­stem. Verð­vit­und mín hefur auk­ist til muna, ég get gert þetta á mínum hraða og raðað í pok­ana eins og mér þókn­ast best, er ekki fyrir þeim sem á eftir mér kemur. Finnst einmitt erfitt að halda 2 metra reglu þegar það eru mann­aðir kassar þar sem sá sem á eftir mér kemur er alltaf að flýta sér. Ég kaupi oft­ast 2-3 poka þegar ég fer. Starfs­fólk er alltaf til staðar til að hjálpa,“ segir Margrét Erla.

Önnur sem tók illa í þessa gagn­rýni var fjöl­miðla­konan María Lilja Þrast­ar­dóttir Kemp. „Vá. Þvílík for­rétt­inda­blinda og elítu­stælar. Á grín­laust að reyna að þvinga lággjalda­verslun úr mið­borg­inni afþví þið getið ekki ýtt vör­unum ykkar sjálf í gegnum “blíbbið”? Afhverju þurf­iði mann­eskju á lág­marks­launum til að gera þetta fyrir ykkur seg­iði?“

Fjöl­miðla­mað­ur­inn Egill Helgason kom svo með hitt sjón­ar­miðið. „Mér dettur ekki í hug að afgreiða sjálfan mig. Og allra síst í miðri far­sótt. Og varð­andi for­rétt­indi, þá held ég að heim­ur­inn verði síst betri ef við leggjum niður verka­manna­störf. Eða gætir þess í vöru­verði þarna hve þjón­ustan er lítil.“

Heiða B. Heiðars aug­lýs­inga­kona svar­aði til baka: „Ég byrj­aði einmitt að nota sjálfs­af­greiðslu af því að það er far­sótt. Ég sé enga ástæðu til að láta fólk á skíta­launum vera enda­laust útsett fyrir smiti.“ Því svarar Egill: „Semsé fólkið sem er að spritta og sótt­hreinsa er ekki útsett fyrir smiti? Ég hef hins vegar furðað mig á að ekki séu betri sótt­varnir fyrir fólk sem er að vinna alls kyns þjón­ustu­störf. Auðvelt að búa til ein­hvers konar búr um þá sem afgreiða í svona búðum – og af hverju eru stræt­is­vagna­bíl­stjórar ekki á algjör­lega aflok­uðum rýmum.“

Egill segir enn fremur að verka­fólki sé eng­inn greiði gerður með þessu kerfi. „En svo er nátt­úr­lega veru­leik­inn á bak við þetta sá að arður af sjálf­virkni­væð­ing­unni mun ekki renna í vasa not­enda og því síður vinn­andi fólks. Þetta þró­ast allt í þá átt að færri og stærri aðilar eiga allt í sam­fé­lag­inu og ójöfn­uður eykst. Eitt sinn var smá­at­vinnu­rekstur helsta hug­sjón hægri manna – nú er það frekar að fólk geti bætt kjör sín með því að eiga hluta­bréf í stóru fyr­ir­tæki.“