Hlín Agnarsdóttir var að senda frá sér skáldsöguna Hilduleik þar sem hún skapar óhugnanlega framtíð fyrir eldri borgara landsins, sem sviptir eru nánast öllum réttindum þegar þeir ná ákveðnum aldri. Hlín segir söguefnið hafa komið til sín eftir dauða móður sinnar sem lést eftir sex mánuði á hjúkrunarheimili, þótt hún hefði fram að því verið ágætlega hress, ekki komin með elliglöp.
Sjálf verður Hlín sextíu og sjö ára í nóvember en hefur engin áform um að draga saman seglin þótt hún komist á aflifunaraldur, eins og hún kallar það í bókinni, langar í meira nám, ætlar að skrifa fleiri bækur og njóta þess að vera samvistum við manninn sem hún fann aftur eftir sextán ár. Hún er rétt að byrja.
„Það hefur lítið verið skrifað um þetta efni áður,“ segir Hlín spurð hvaðan hugmyndin að efni bókarinnar hafi sprottið. „Ég er að velta því fyrir mér hvernig þjóðfélagið gæti hugsanlega orðið þegar okkur sem komin erum á aflifunaraldurinn fer að fjölga. Hugmyndin kviknaði þegar mamma mín dó fyrir þremur árum síðan. Í fyrsta lagi var það algjör martröð fyrir okkur systkinin að fá það sem heitir vistunarmat fyrir hana, það er þegar verið er að sækja um vistun fyrir aldraða ættingja á þessum svokölluðu hjúkrunarheimilum. Mamma var áttatíu og sjö ára, ekki mikið veik en gat ekki lengur alveg séð um sig sjálf, þannig að við vildum gjarnan koma henni inn á hjúkrunarheimili eftir að hún var útskrifuð af spítala eftir mjaðmarbrot. Í fyrstu voru engin úrræði og svo loksins þegar úrræðið kom var það eitt herbergi á Hrafnistu. Hún lifði ekki nema sex mánuði eftir að hún fór þar inn……“
Hlín er í forsíðuviðtali í nýjasta tölublaði Vikunnar sem kemur í verslanir á morgun, fimmtudag.
Sigurður Helgi Oddsson píanóleikari stofnaði Sveiflustöðina, þar sem hann vildi færa Íslendingum gleði sveiflutónlistarinnar. Í viðtali við Vikuna segir hann að dansinn, eins og tónlistin, talar til okkar allra.
Halla Oddný Magnúsdóttir, viðburða- og skipulagsstjóri hjá Sinfóníuhljómsveit Íslands er önnum kafin að undirbúa viðburði vetrarins. Hún hefur þó ekki lagt sjónvarpsvinnuna á hilluna, en sjónvarpsþættir hennar og menningarviðtöl hafa vakið athygli og aðdáun.
Guðjón Birgir Jóhannsson, útibússtjóri Securitas á Austurlandi er undir smásjánni. Hann segist sjaldnast geta staðist góð tækifæri, þau séu alls staðar.
Embla Wigum er ung að árum, en hefur vakið verðskuldaða athygli á samfélagsmiðlum fyrir fantasíufarðanir sínar. Hún getur breytt sér í hvað og hvern sem er með förðunarburstunum.
Í Vikunni má einnig finna umfjöllun um tísku, heilsu, heimili og hönnun, auk þess sem krossgátan, orðaleit og stjörnuspá Vikunnar eru á sínum stað. Í Lífsreynslusögu Vikunnar segir kona frá óhappi bróður hennar, sem hafði svo miklar afleiðingar að það breytti öllu lífi hans og fjölskyldunnar.
Tryggðu þér eintak í næstu verslun eða í vefverslun okkar.
Tryggðu þér áskrift að Vikunni í vefverslun >
Texti / Friðrika Benónýsdóttir
Myndir / Hallur Karlsson
Athugasemdir