Lögreglan á höfuðborgarsvæðinu segist í dagbók sinni hafa stöðvað svall í miðbæ Reykjavíkur í gær. Á meðal gesta var ónefndur ráðherra í ríkisstjórninni. Í dagbók lögreglu segir:
„Lögregla var kölluð til vegna samkvæmis í sal í útleigu í miðbæ Reykjavíkur. Veitingarekstur er í salnum í flokki II og ætti því að vera lokaður á þessum tíma. Í ljós kom að á milli 40-50 gestir voru samankomin í salnum, þar á meðal einn háttvirtur ráðherra í ríkisstjórn Íslands.“
Lögreglan segir að flestir hafi verið ofurölvi í þessu samkvæmi. „Töluverð ölvun var í samkvæminu og voru flestir gestanna með áfengi við hönd. Lögreglumenn veittu athygli að enginn gestanna var með andlitsgrímur fyrir andliti. Lögreglumenn sögðu að nánast hvergi voru fjarlægðartakmörk virt. Lögreglumenn sáu aðeins 3 sprittbrúsa í salnum,“ segir í dagbók.
Lögreglan hefur orð á því að henni hafi verið líkt við nasista. Það kann að skýra þessa fádæma harðorða dagbók. „Lögreglumenn ræddu við ábyrgðarmenn skemmtunarinnar og þeim kynnt að skýrsla yrði rituð. Þá var gestum vísað út. Þegar að gestir gengu út voru flestir búnir að setja upp andlitsgrímu. Gestirnir kvöddust margir með faðmlögum og einhverjir með kossum. Einn gestanna var ósáttur með afskipti lögreglu og líkti okkur við nasista.“
Athugasemdir