Áfrýjunardómstóll í New York tekur í dag fyrir kröfu Donalds Trump Bandaríkjaforseta um að sakfelling hans fyrir 34 ákæruliði vegna fölsunar viðskiptaskjala verði felld úr gildi. Með sakfellingunni í maí 2024 varð Trump fyrsti fyrrverandi Bandaríkjaforsetinn til að vera sakfelldur fyrir refsiverðan verknað. Hann hefur síðan snúið aftur í Hvíta húsið án þess að hafa þurft að afplána refsingu.
Málið snerist um 130.000 dala greiðslu til klámmyndaleikkonunnar Stormy Daniels skömmu fyrir forsetakosningarnar 2016. Greiðslan átti að tryggja þögn hennar um meint kynferðislegt samband við Trump um áratug áður. Trump hefur ávallt neitað því að sambandið hafi átt sér stað.
Greiðslan fór í gegnum Michael Cohen, þáverandi lögmann Trumps, sem fékk síðar upphæðina endurgreidda frá fyrirtæki forsetans. Saksóknarar segja að greiðslan hafi verið færð ranglega í bókhaldið sem lögfræðikostnaður og að Trump hafi með því reynt að fela upplýsingar sem hefðu getað skaðað kosningabaráttu hans.
Lögmenn Trumps halda því fram að málið hafi verið pólitískt aðför að forsetanum og að sönnunargögnin gegn honum séu ófullnægjandi. Þeir gagnrýna einnig að kviðdómendur hafi fengið að heyra vitnisburð um samskipti og starfshætti í Hvíta húsinu á fyrra kjörtímabili hans.
Verjendur Trumps vísa til friðhelgi forsetaembættisins og segja að viðbrögð hans við ásökunum Daniels hafi verið hluti af embættisskyldum hans. Saksóknarar hafna því og segja að um einkamál hafi verið að ræða sem tengdist ekki opinberum störfum forsetans. Þeir benda jafnframt á að fjöldi annarra sönnunargagna liggi fyrir gegn honum.
Trump hefur einnig reynt að fá málið flutt fyrir alríkisdómstól og því vísað frá á grundvelli forsetafriðhelgi, en þeirri kröfu hefur ítrekað verið hafnað. Áfrýjun vegna þeirrar niðurstöðu verður tekin fyrir 16. nóvember.
Athugasemdir